2018 inthlan a thianghlim nan MPF-in beihpui thlak dan an zirho

Mizoram People Forum (MPF) chuan kum 2018 MLA inthlanpuiah boruak muanawm, thianghlim leh zangkhai siam tumin beihpui a thlak tan.

Nimin khan Synod Conference Centre-ah beihpui thlak inkhawm hi MPF president Rev. Lalzuithanga'n hawngin thuchah a sawi nghal a, MPF adviser K. Sapdanga paper buatsaih "2018-a assembly inthlanpui hmachhawn dan" chu zirho nghal a ni.

Rev. Lalzuithanga chuan, "Mizoram politics leh inthlan boruak chu Chanchin Ṭha nen a inmil loh chuan, Mizo hnam chu kan boral ngei ang. Political party-te hi kohhran hnuaia kûn turin kan phût lo a, roreltu nih tuma an beihnaah Chanchin Ṭha bosal lo turin kan duh a ni," a ti. Kohhrana rawngbawltu pawimawh tak takte chu politics-ah telna pawl an lo nei a nih pawhin, an pawl aia Chanchin Ṭha dah chungnung ṭhin turin a chah a, MPF-a sulsutute phei chu party-a ṭan lam nei lo turin a ngen bawk.

MPF President chuan, "Kan ṭhalaite khawpui dai vela zan lama an khawsak dan mit ngeia han hmuh chuan, Mizoram hian Chanchin Ṭha kulh hi a chim nasa tawh hle tih a hriat theih a, mahse ṭhalaite dem ringawt loin, siamṭhat hna thawktu rawngbawltute hian thawh tur kan ngahzia inhriat chhuah nan hmang ila, chona a na hle tih kan pawm tur a ni," a tia a, ram rorelna chu siamṭhat hna thawhna hmun remchang leh awmze neihna ber a nih vangin, ram roreltu siam tura kan inthlan hunah boruak thianghlim, felfai leh sangkhai kan siam a ngai a, chu chu MPF-in a tum lian ber leh a din chhan pawh a ni," a ti.

Rev. Lalzuithanga chuan, tun hmain MPF hnathawhin awmzia a nei hle tih sawiin, "Inthlan awm tawhah vote duh vanga invaukhanna atan silai mu semte pawh a lo awm tawh ṭhin. MPF hi awm lo ngat ila chuan, kan inthlanna hi a tenawm tawh ngawt ang," a ti a; Kohhran leh Tlawmngai pawl awm ve lohna state dangah inthlan boruak tenawmin rit hle mah se, Mizoramah chuan boruak ralmuang tak kan siam thei a, kan siam ngai tur a ni a, chumi atan chuan MPF district forum te, constituency forum te, local forum zawng zawngte lo inbuatsaih a, lo intuai thar turin ka chah a ni," a ti.

Paper buatsaihtu K Sapdanga chuan, "Inthlanpui hmachhawn nan MPF leh political party-ten thawhhona thuthlung an siam khauh deuh changin inthlan boruak a ziaawm a, thuthlung a nem deuh changin inthlan boruak a ṭawp a, chuvangin kum 2018-ah chuan thuthlung khauh tak siam MPF chuan a duh dawn a ni," a ti a, "Thuthlung bawhchhia te, Election Commission dan siam bawhchhiate chu dimdawi lova huaisen taka do let ni se, chu chuan inthlan boruak a siam ṭha chauh ang," a ti bawk.

"Kum 2017 chhungin MPF local forum la din lohnaah din chhuah vek a, kum 2018 aṭangin ṭhahnemngai tak leh phur taka thawk thei tura intuaithar ni se, India ram state dangte leh khawvel mak tih khawpa inthlanna thianghlim Mizoramah hian a siam theih tih hi kan lantir tur a ni," paper buatsaihtu chuan a ti bawk.

Nimina MPF hruaitu inkhawm hi MPF vice president Rev. Robert Vanlalliana'n a kaihruai a, rawngbawltu ṭhahnem tak an tel a ni.