Mizoramah Holi hlim taka hman a ni

Nimin kha Hindu kut pawimawh, Holi (rawng intheh kût) a ni a, India ram pumah lawm niin, Mizorama Hindu-te pawhin hlim takin an lawm a, Hindu ni lote pawhin an hmanpui bawk.

Holi pual hian Gover­nor Lt. Gen. Nirbhay Sharma chuan thuchah a tichhuak a, "Holi hi mi zawng zawngin sakhua, chi leh hnam sawi loa hlim taka an lawm ṭhin a ni a, mi dangte hmangaihna lan chhuahtirna hun a ni," tiin, ram mipuite chu mi dangte hmangaihna kawnga hmasawn zel turin a chah.

Larsap chuan, Holi-ah hian Mizoram mipuite duhsakna a hlan a, Mizoram ralmuanna tipung zel turin a chah bawk. Holi hi Raj Bhavan-ah pawh hlim taka lawm a ni a, Governor-in a hmanpui a ni.