Aizawl-Tuipang kawng siam turah In 3,230 tihchhiat a ngai dawn

National Highway no. 54, Aizawl leh Tuipang inkar kawngpui siam hna thawhna turah chhungkua 3,534 a nghawng dawn a, chenna in 3,230 chu tih­chhiat a ngai tura chhût a ni.

Aizawl-Tuipang kawng laih turin nghawng a neih dan tur zir chiang tura Mizoram sorkarin a din, Expert Group-in report-a an tarlan danin, project-in a nghawng tur chhungkaw 3,534 zinga in ṭhiah ngai tur 3,230 hi 86.05% a ni a; anni hian an chenna in, sumdawnna leh thil dang atana hman an ramte an chàn a ngai dawn a ni.

Project-in a nghawng tur chhungkaw 3,534 zing­ah hian 25% aia tam deuh chu hmeichhe enkawl chhungkua an ni a, 65% aia tam chu an kum ngaihtuahin hna thawk thei an la ni. Chhungkua a nghawng turte hi district panga - Aizawl, Lunglei, Lawngtlai, Siaha leh Serchhip district-a khaw 50-a mi an ni a, a nghawng tamna ber Lunglei district-ah chuan khaw 16-ah chhungkaw 1,357 a nghawng dawn.

Ram tihchhiat ngai tura chhût chu hectare 100-a zau a ni a, chu'ngte chu LSC 65%, V/C pass 24%, periodic patta 4%, a dang 2% leh pass awm lo 5% a ni. Ram lak tur tam ber chu tun dinhmunnah chenna atana hman mek a ni a, chenna in 3,230 chu a zavaiin emaw, a ṭhen azar emaw tihchhiah a ngai dawn. In tihchhiat turte chu concrete building 479, Assam type in 2,160 leh râp in 583 a ni.

Project-in a paltlang turah hian dawr 360, hotel/restaurant 82 leh workshop/garrage 61 leh thil dangte a awm a, sumdawngte'n an ram lak a nih vanga thla khata an sum hloh tura chhût chu cheng nuai 112.73 vel a ni a, mi tam takin an eizawnna an chàn phah dawn bawk. Lo neitute'n an sum hloh tura chhût chu kum tin cheng nuai 391.45 a ni thung.

Chhungkaw sawn chhuah turte inbenbelna leh awm zel dan tur buaipui turin district pangaa Additional DC-te ruat an ni a, anni hian an district ṭheuha chhungkuate an buaipui ang. Ram lak tura ruahmante chu office hun chhungin mahni huam chhung DC office-ah ṭheuh en theih a ni.

Ram lak tura sawisel duh nei tan notification chhuah aṭanga ni 60 chhungin Mizoram (Land Acquisition, Rehabilitation and Resettlement) Acts, 2016 tlawhchhanin mahni district ṭheuha District Collector (Bawrhsap)-te hnenah thehluh theih a ni a; notification hi December 19, 2016-ah chhuah a ni tawh.

Aizawl-Tuipang kawng hi km. 380-a thui a ni a, ruahman dan chuan kawng hi metre 12-a zau a siam tur niin, alkatra luan chin chu metre 8-a zau tur a ni. Ram lâk tihfel a nih chuan hna thawktu tur Japanese International Cooperation Agency (JICA) chu hna thawk turin an inpeih tawh a, kum li ral hmaa thawh zawh tum a ni.

Project-in a nghawng tur
District Khua Chhung
-kua
Aizawl 13 929
Serchhip 6 726
Lunglei 16 1,357
Lawngtlai 7 215
Siaha 8 307
Total 50 3,534