KHAWTHLIR

Dâwt thehdarhtu Mi 2 man an ni
Mizoram sorkarin zu a lak luhte ṭha lo leh intlak loh a nih thu social media-a thehdarhtute - Khawlhmunsiama (Facebook profile - Gemini Khawlhring), Ramhlun North leh Lalthantluanga (Facebook profile - LT Hmar), Ṭhiak khuate chu police-in an man. Khawlhmunsiama leh Lalthantluanga te hian Facebook-ah sorkar zu lak luh a ṭhat loh thu an thehdarh thu police hmaah an puang a, Court remtihnain jail-ah dah an ni.

Thisen pe
Khatla South Branch YMA chuan an din champha pualin nimin khan Synod Hospital tan thisen unit 36 an pe a, a petute mipa 31 leh hmeichhia panga an ni.

Florist Fair
Lunglei District Florist Grower Association chuan nimin aṭang khan Saikuti Hall-ah 'Florist Fair' an buatsaih ṭan. Florist Fair-ah hian pangpar chi hrang hrang bakah, pangpar chi leh thei ṭiakte tlawm zawka lei theih turin pho chhuah a ni a; March 17, 2017 thleng neih a ni ang.

Faina hnatlang
Sihphir Village Council bultumin nimin khan Swach Bharat Mission hmalakna kal zelah khawtlang thenfai hnatlang neih a ni. Hnatlangah hian sikul 13-a zirlaite leh zirtirtute bakah, khawtlang hruaitu mi 300 chuang an thawk chhuak a ni.

Hall sak enfiah
Lunglei Chanmari-a hall sak mek chu nimin khan bialtu MLA, Joseph Lalhimpuia'n tlawhin, hnathawh dan a enfiah a, thawktute chuan 90% vel an thawh zawh tawh thu an sawi. Hall hi DoNER aṭanga hmuh Rs. 4,96,19,000 hmanga sak a ni a, badminton court pathum, table tennis board pathum, basketball court pakhat, dormitory leh garage bakah hall hnuaiah hian Govt. Primary School-II a awm dawn a ni.