Congress tlakchhiatzia a lang zel : Zoramthanga

MNF president Zoramthanga chuan, tun hnaia state pangaa Assembly inthlanah Congress party tlakchhiatzia a lang zel nia sawiin, "Mizoramah pawh nakkumah Pathian leh mipui zarah Congress sorkar paihthlaka awmin, MNF kan sorkar ang," a ti.

Nimina Kolasib Diakkawn YMA Hall-a Kolasib MNF Block Conference-ah thu sawiin Zoramthanga chuan, "Kum 2018-ah Pathian leh mipui zarah kan sorkar ang a, administration leh development danglam tak a thleng ang," a ti a; an policy thar, SEDP chu an peihfel thawkhat tawh a, an tlangzarh thuai dawn thu leh retheihna leh harsatnate chu SEDP hmanga an hneh dawn thu a sawi.

MNF President chuan, hnam movement-ah hmun hrang hrang­a Mizo hnahthlakte an tuihâl tawh em em niin a sawi a; "Tunah chuan development a chàwl ṭhuap a, sorkar hnathawkin hlawh an la thei lo a, hnathawhna tur sum an nei lo a, kohhran leh mipui duh loh zu an zuar lui a. Chuvangin, kum 2018 inthlanah Pathian leh mipui zarah kan tling ngei dawn a ni," a ti.

Zoramthanga sawi danin, Mizoramah sorkar hnathawk 60,000 vel an awm a, anni hian vote nuai 2.5 vel an keng tel a ni. Sorkar hnathawkte hi Mizoram sorkar an ning a, tih tur pawh an nei tawh lo, pawisa a awm lo tih vek a ni tawh.

Zoramthanga chuan, kum 1990 chhoah MNF chu chhe tinrengin a bâwm tih sawiin, "Delhi lamah te, district council-ah te, V/C-ahte kan chak lo vek a, MP inthlanah pathumna kan ni a, MNF kan phel phawk zui a ni," a ti a; chutih rualin, kum 1998-ah PC nena thawkhoin undivided Aizawl district-ah MLA 28 neiin, Saitual bial chiah an hloh tih sawiin, kum 1998 aia nasain Congress chu an che chhe tawh niin a sawi bawk.

MNF thuchhuah chuan, nimina Kolasib MNF Block Conference-ah hian an president Zoramthanga'n MNF zawm thar mi 432 a lawm lut niin a tarlang.