Sihphir-in kawng an siamṭha

Sihphir Joint Action Committee on Road hmalaknain nimin khan Selesih leh Sihphir inkar kawng chhe lai chu Sihphir khawtlangin hnatlangin an thawm ṭha. Kawng hi RCC hmanga siam a ni.

Kawng siamna atan hian Sihphir khaw mi leh Sihphir khaw chhuak hmun danga awm tawhte'n Rs. 1,70,000 an thawhkhawm a; bialtu MLA R Lalrinawma'n Rs. 6,000 leh AMC ward. no. 1 councillor R Zomuanpuii ten Rs. 2,000 an thawh bawk.

Sihphir JAC on Road chuan, Selesih leh Sihphir kawng chu a enkawltu BRTF-te'n hun rei tak an siam tawh lo tih tarlangin, "Kawng siamṭhat a nih theihna atan Project Pushpak chief engineer, superintending engineer leh OC-te vawi eng emaw zat hmu a ni tawh," an ti.

Project Pushpak aṭangin beisei tur a awm rih loh tih sawiin JAC on Road chuan, "Hma kan la chho ta a ni," an ti a; kawng hi thawm ṭhat chhunzawm zel a nih theih nan Project Pushpak-ah leh a theihna ang angah hma an lak zel dawn thu an tarlang.