Assembly budget session ṭan a ni ; Sorkarin mipuite hmasawnna tura A intiamna a vawng reng - Governor

Mizoram Legislative Assembly budget session chu nimin khan ṭan a ni. Thu sawitu, Governor Lt.Gen. Nirbhay Sharma chuan, Mizoram sorkarin kawng hrang hranga mipuite hmasawnna atana hmalak a intiamna a la vawn nun reng thu a sawi.

Governor chuan, Mizoram sorkar chu House member-te leh Mizo mipuite'n an thawhpui chhunzawm zel a beisei thu sawiin, "Sorkar chuan hlawhtlinna chang tur te, kawng hrang hranga mipuite hmasawntir turte leh remna leh muanna vawng nung zela tura hmalak a intiamna a la vawng nung reng a ni," a ti.

Larsap chuan, Mizoramin remna vawnhim leh ei leh bar leh khawtlangah hmasawnna kawng a zawh zel tih sawiin, "Mizoram hian hmasawnna leh ṭhan zelna kawngah a ṭhenawm state-te mai ni lo, India ram pum tan entawn tur a hnutchhiah ngei ang," a ti a; Mizo mipuite chu duhsakna a hlan.

House member-te chu an mawhphurhna leh mipuite hnena an intiamna hre thar leh tura chahin Larsap chuan, lang tlang leh belhchian dâwl ni tura theihtawp chhuah zel a pawimawh thu a sawi.

Lt.Gen. Nirbhay Sharma chuan, Mizoram sorkarin autonomous district council (ADC)-te hmasawnna a ngaih pawimawh thu sawiin, "ADC-te tan hian plan aṭangin cheng nuai 6202.52 leh non-plan aṭangin cheng nuai 17,228.90 kumin sorkar kum chhungin pek an ni tawh," a ti.

Mizoram sorkar leh HPC(D)-te'n inbiak tàwpna an neih thuai a beiseiawm tih sawiin Larsap chuan, "Mizoram sorkar leh HPC(D)-te hi ṭum thum an inbe tawh a ni," a ti a; inbiakna an neihah hian HPC(D)-te'n silai leh a mu police-te ta an lakte chu Mizoram sorkarah an hlan let thu a sawi.

Governor tarlan danin, kum 2016-17 (December 2016 thleng) chhung khan Land Revenue & Settlement (LRS) department-in house pass 524, LSC 2,564, agriculture lama hman atan LSC 13 leh land lease 494 an pe chhuak a; ram chungchanga thubuai 2,921 an chingfel bawk.

Mizoram police-te'n kumin sorkar kum chhungin silai pasarih, silai mu 513 leh magazine paruk, pawisa lem Rs. 3,30,000 hû leh rangkachak cheng vbc. 81.9 hû an man a ni.

Nirbhay Sharma chuan, hmasawnna hna chak zawka thawh a nih theih nan kawng neih ṭhat a pawimawh tih sawiin, "Kum 2016-17 chhungin kawng 16 siam zawh a niin, km. 211.11 a thui blacktop a ni a, tunah hian kawng 58 siam hna thawh mek a ni. Lei pathum dawh zawh a ni tawh a, lei dang pasarih dawh hna thawh mek a ni," a ti.

Governor-in thu a sawi zawhah INC member Lalrobiaka'n Governor thusawi vanga lawmthu sawina tur motion a pu lut a, INC member vêk John Siamkunga'n a thlawp. Governor thusawi hi vawiinah sawiho a ni ang.