Lo halah sorkarin ngaihhnathiamna a nei dawn ; Aizawl dist-a lo hâl hun hnuhnung - March 31

Mizoram sorkarin lo hâl hun hnuhnung a ruat chu vawiin March 15 hi a ni a; mahse, kuminah ruah a sûr hma avangin March 15-a lo hâl hman lote ngaihhnathiam an nih tur thu sorkar thuchhuah chuan a tarlang.

Sorkar thuchhuah tarlan danin, lo hâl hun tur chu district tina DC-te’n DLAO leh V/C-te beráwn chhungin, khaw awm dan azirin March thla chhungah âwm an tih hun an ruat dawn a ni. Sorkar thuchhuah chuan, lo hâl tur neite chu meikawng ṭha taka sial turin a chah.

Aizawl DC Kannan Gopinathan chuan thupek chhuahin, Aizawl district-a lo hâl hun hnuhnung atana bituk hmasa, March 15 tih chu local council/village council-te ngenna avang leh khuain a zir loh avangin March 31-ah sawn hlat a nih thu a tarlang.

Aizawl DC thupek tarlan danin, Lengpui Airport hnaih khua - Lengpui, Hmunpui, Serzawl, Nghalchawm, Lengte, Sihhmui, Sairang, Sairang Dinthar leh Mualkhang-te chu thlawhtheihna veivâk awm tawh loh hnu, tlai dar 3 hnu lamah chauh lo/huan hâl tura hriattir an ni.

Lo hâl turte'n mei kawng an sial vek tur a nih thu sawiin Aizawl DC chuan, "Mi tumahin ram tihkan loh tur a ni. VC/LC-te hriatpuina loin tumahin lo hâl tur a ni lo," a ti.

Aizawl DC chuan, ramhnuaiah meizial bung paih leh mei chhêm mai mai khap a nih thu a puang a, kângmei lakah him theihna atan in leh a velte tifai a, awlsam taka kâng kai thei thil laka fimkhur turin mipuite a hriattir.

Thupek hian thla hnih chhung a huam dawn a, a zâwm lote chu IPC Section 188 hmang hrem theih an ni.