KHAWTHLIR

Pun khawm khap
Niminah Assembly session ṭan a ni a, March 30 thleng neih a ni dawn. Session chhung hian Aizawl Head Post Office aṭanga Raj Bhavan chhim lam gate inkarah vantlang, politics, sakhuana leh thil dang vanga mi panga aia tam pun khawm leh bengchheng siam khap a ni. Thupek hian March 10, 2017 aṭanga chhiara ni 60 chhung a huam ang.

Fimkhur turin ti
Traffic SP chuan thuchhuah siamin, vawiin aṭanga March 22, 2017 thleng khian SIPMIU-in Vaivakawn Police Station leh Kanan Veng Presbyterian biak-in inkar kawng siam ṭhat hna an thawh dawn avangin, hna thawh chhungin chawhma dar 10:30 aṭanga tlai dar 4 inkarah lirthei leh mipui kêa kalte fimkhur tur leh hna thawktute tibuai lo thei ang bera kal turin a hriattir.

Panel of Chairman
Assembly speaker Hiphei chuan, nimina ṭan tâk Mizoram Legislative Assembly budget session neih chhunga Panel of Chairman atan Nihar Kanti Chakma, T Sangkunga, Lalruatkima leh Lalrinawma te a ruat.

Lawngtlaiah workshop
Lawngtlai College leh Mizoram Science, Technology & Innovation Council (MISTIC) ṭangkawp chuan nimin khan Lawngtlai College-ah 'Intellectual Property Rights and Grass-Root Innovation' tih thupui zirhona an buatsaih a, tualchher thiamna leh hmanraw siam chhuahte dan hmanga humhalh pawimawhna zirho a ni.

Heroin man
Excise & Narcotics department-a Anti Narcotics Squad-te chuan, nimin chhun dar 12:45 khan Chhinga Veng (Saron Veng road)-ah heroin gram 63 leh a neitu puh M Thangi (44) w/o Laldinglura, Zokhawthar nia inchhál an man. M Thangi hi NDPS Act hmanga thubuai siamsak a ni.