Medili-ah Forest duty-te hel hoin an vau

March 13, 2017 khan Kanhmuna forester L Biakliana Ngaihte leh HC Hrangthanvula te chu Mizoram leh Assam inrina, Medili luia mau tawlh ruk tur an vên laiin ralthuam keng hel nia hriatte'n an vau niin MZP headquarters, Zawl­nuam chuan an tarlang.

Zawlnuam MZP tarlan danin, ralthuam keng hel ho hian L Biak­liana leh Hrangthanvula te chu mau tawlh rûk man tawh lo tur leh duty tawh lo turin an ti a, Kan­hmuna haw turin an hriattir bawk.

Anmahni vautute hian ral­thuam an ken avangin Forest department-a thawk pahnihte chu an haw nghal a, lirtheia an tlan tawh chu hel ho chuan silaiin an kap a, mahse, an kap fuh lo a ni. Hel ho hi mi pali an ni a, AK-47 rifle pathum leh pistol pakhat an keng.

Kanhmun police-te chuan thil thleng an hriat veleh OC Zoramsanga hoin Medili lui an pan nghal a, invauna hmun an thlen chuan hel ho chu an insaseng hman tawh a ni.

Zawlnuam MZP chuan, Mizorama mau tawlh rûk tur vengtu Forest department-a thawkte Mizo­ram chhunga vau leh kah an ni chu pawi an tih thu an tarlang a, "Tun hnuah hetiang thil hi a thlen tawh loh nana hma la tur leh hel hote hi man chhuak ngei turin sorkar thuneitute kan ngen. He lai hmun hi ramri buai reng a nih avangin sipai tam zawk dah turin thuneitute kan ngen bawk a ni," an ti.

Forest department mi vau an nih aavng hian MNF ṭhalaite pawhin thu­chhuah siamin, Forest duty-te tibuaitu misualte chu an dem thu an tarlang a, "Hel nge an nih, Cachar Paper Mill mi leh sate tih chhui chhuaka man thuai turin Mizoram sorkar kan phût," an ti a; Kanhmun chhehvelah Assam aṭanga buaina siam an awm fo avangin police dah belh thuai turin sorkar an phût bawk.