Bussiness Summit kharnaah Larsap

March 9-10, 2017 chhung khan Indian Chamber of Commerce (ICC)-in New Delhi-ah ‘11th North East Business Summit’ an buatsaih a, a khârna chu Governor Lt.Gen. Nirbhay Sharma-a'n hmanpuiin, thu a sawi.

Summit khârna inkhawm hi ICC president Aditya Agarwal-in a kaihruai a; Larsap Nirbhay Sharma chuan, Mizoramin ram pahnih - Myanmar leh Bangladesh bakah state pathum - Manipur, Tripura leh Assam-te nen ramri an inṭâwm tih sawiin, "Boruak, sik leh sa duhthusama nuam leh state ralmuang tak a ni. Mizoram hi outpost ang leka thlir a ni ṭhin a, tunah chuan sorkar laipuiin ‘Look/Act East Policy’ chak taka a kalpui hnuah ‘Gateway to Southeast Asia’ angin a ngaih theih tawh a ni," a ti.

Mizoram leilung hausakna hman thiam chuan ramhmul damdawi, mau, organic farming, thingpui leh ṭhelrêt bakah, zin mite hîpna turin a chei theih tih sawiin Larsap chuan, "Mizoram Industrial Policy 2012 hnuaiah Foreign Direct Investment (FDI) nena thawhhona tur ruahman a ni a, state leh ram páwn aṭanga cheng nuai 500 chung lam invest duhte tan state sorkar chu engtik lai pawhin a inhawng reng a ni," a ti a; sorkarin a pawm chuan an sumdawnna turin ram pawh hman hawhtir a phal thu a sawi.