Jail-a medical duty-te HIV/AIDS zirtir

Project Sunrise, SHALOM, Project Nauban (Research) leh MSACS-te ṭangho chuan, nimin khan Aijal Club-ah jail-a medical staff-te pualin capacity building workshop an buatsaih a; Prison DIG K Lawmthanga'n a hmanpui.

Workshop-ah hian Central Jail leh Aizawl District Jail-a medical staff te, ART Plus Center-a thawk te, TB programme-a thawkte leh HIV/AIDS donaa hma latu pawl aiawhte an tel a; HIV/AIDS leh ngawr (TB) chungchang zirho a ni a, FHI-360, MSACS leh TB programme lama hotute'n thil pawimawhte an zirtir a ni.

Prison DIG chuan, Prison department-ah kum 41 a thawh chhungin jail-a medical staff-te tana HIV/AIDS chungchang inzirtirna buatsaih a la ni ngai lo tih sawiin, "Jail lamah medical staff-te an indaih loh em em laia jail tángte hriselna lama enkawlpuitu an awm hi a lawmawm em em a ni," a ti a; Prison department chu HIV/AIDS donaah thawktute theihtawp chhuaha ṭawiawm an inhuam thu a sawi.