FCSCA-in Mizoram buhfai an lei ngai lo ; Mamawh zatve dáwn thar chuah a ni thin

Agriculture department record-a a lan danin, tun hnai kum nga chhunga Mizoram aṭanga buhfai thar chhuah zat chu Mizoramin kum khata buhfai a mamawh zatve dawn a ni ṭhin. Hetih lai hian, Food Civil Supply & Consumer Affairs (FCSCA) department chuan Mizorama buhfai thar chhuahte a lei ngai lo.

Agriculture department tarlan danin, Mizorama buhfai thar chhuah zat chu - kum 2012-13 ah quintal 5,77,000, kum 2013-14 ah qtl. 5,89,940, kum 2014-15 ah qtl. 60,679, kum 2015-16 ah qtl. 6,20,890 leh kum 2016-17 ah qtl. 6,06,440 (a la pun beisei a ni) a ni a; hetih lai hian, Mizoramin kum khata buhfai a mamawh zat chu qtl. 15,00,000 vêla chhût a ni.

Vanglaini palai zawhna chhangin FCSCA hotute chuan, Mizorama thar chhuah buhfai an la lei ngai loh thu an sawi a, "Agriculture department hotute nen kan sawiho tawh a, Mizorama thar chhuah lei tur a hlawma an neih tak tak leh tak tak loh kan zawhin an zuam lo," an ti. Agriculture department record-a a lan dan chuan, kum tin Mizoramah buh eng emaw zat thar ṭhin a ni.

FCSCA hotute sawi danin, ramria buh hmun tam tak chu hnam dangin an enkawl a, Mizoram aṭanga thar chhuah ni tho mah se, state dangah hralh a ni ṭhin.

Agriculture department chhinchhiah danin, tun dinhmunah Mizoram pumah leilet (WRC) ram hectare 16,922 enkawl mek a awm anga chhût a ni a, hei hi chhungkaw 12,917 velin eizawn nan an hmang. Mizoram pumah WRC atana cheibâwl tlak ram zawl leh awihtlân hectare 74,644-a zau a awm anga chhût a ni a, WRC atana cheibawl tlak la cheibâwl loh hectare 57,722 vela zau a awm.

Kum 2012-2016 chhung khan RKVY hnuaiah leilet siamna atan cheng nuai 2,777.68 hman a ni a, chumi hmang chuan WRC-I leh WRC-II hectare 2771.55-a zau siam a ni. Kum 2012-2016 chhung vêk hian, WRC I leh II siamna atan cheng nuai 12,393.453 hman a ni a, WRC hectare 5,825 siam thar a ni.

Hetih lai hian, kum 2016-17 chhung hian Mizoram pumah tlangram lo neia eizawng chhungkaw 45,259 an awm mek niin Agriculture department chuan an chhinchhiah.

Mizorama buhfai thar chhuah dan
Kum Leilet Tlangram Belhkhawm
(Quintal)
2012-13 3,05,720 2,71,280 5,77,000
2013-14 3,33,230 2,56,710 5,89,940
2014-15 3,77,460 2,43,430 6,20,890
2016-17 3,69,790 2,36,650 6,06,440