Kolasib dist-a lo hâl hun tawp - March 25

Kolasib DC H Lal­engmawia chuan, Kolasib district-a lo hâl hun hnuhnung atan March 25, 2017 a nih thu a puang.Hetih lai hian, Champhai district-a chuan lo hal hun hnuhnung tihfel a la ni lo.

Kolasib Bawrhsap chuan thupek chhuahin, March 25 aia tlai loah lo leh huante hâl vek tur a nih thu a puang a; an district-a V/C tinte chu an khua ṭheuhah March 25 aia tlaia hâlte chu an bialtu Police O/C leh Forest RO-te hnenah hriattir turin a ti.

Lo hâl ní-ah Police leh Forest staff-te duty vek tura tih an ni a; Hortoki, Kawnpui, Khamrang leh Mualkhang ramahte chuan chawhnu dar 3 hnuah chauh hâl tur a ni.

V/C tinte chu an huam chhungah lo/huan/leipui vattute hming, ram vah zau zawng, ram hming leh thlai chìn an tumte fel taka chhinchhiah a, DLAO leh DFO hnenah thehlut tura tih an ni a; meilam ṭha taka sial hmasak tura tih a ni bawk.

Hetih lai hian, March 14-a Champhai Dis­trict Fire Prevention Committee (CDFPC) mem­ber-te an chairman Vanlalngaihsaka, Champhai DC hoa ṭhu-khawm chuan an district chhunga lo hâl hun hnu­hnung an bithliah nghal lo a; Champhai Dis­trict Village Council Asso­ciation hruaitute nena sawiho phawt a, chu mia thutlukna zûlzuia bithliah an rêl.

CDFPC secretary Van­lalchuailova tarlan dan­in, January leh Februa­ry chhung khan Champhai khawpui leh chhehvel V/C panga huam chhung­ah ram a kâng nual a, ram kâng zau zawng chu hectare 80.06-a ni. Chhungkaw 455-in an lo/huan, hectare 363.8-a zau an hal tawh a ni.