House-ah MLA hlui thite sûn an ni

Nimin khan Assembly budget session chhunzawm a ni a; tun ṭum session leh session hnuhnung ber inkara MLA hlui thi pathum - Zosiama Pachuau, C Lalruata leh Tamil Nadu chief minister a nih laia thi Jayalalitha Jayaram-te sûnna hun hman a ni.

House leader Lal Thanhawla'n mi pathumte chanchin a sawi a; MNF member K Sangṭhuama, MPC member Lalthanliana leh INC member pahnih PC Zoram Sangliana leh RL Pianmawia ten uina thu an sawi hnuah, mi pathumte sûnna atan speaker kaih­hruainain member-te chu ngawi rengin minute khat an ding.

Zosiama Pachuau hi August 15, 1944-ah a piang a, zina lamah Gauhati University aṭangin MA a zo. Kum 1984-ah People's Conference party a zawm a, hemi kum vek hian PC ticket-in Ngopa bial aṭangin MLA atana thlan tlin a ni.

Ngopa bial aṭang hian Zosiama hi a záwnin term thum - kum 1984, 1987 leh 1989-ahte MLA atan thlan tlin a ni a, kum 1993-ah Kolasib bial aṭangin thlan tlin leh a ni.

Kum 1993-a Congress party kaihhruai sorkarah Cabinet Minister atana lak luh a ni a; Higher & Technical Education, Soil & Water Conservation leh Environment & Forest department-te a enkawl.

Zosiama Pachuau hi December 20, 2016 aṭangin khumbetin a damlo a, December 28, 2016-ah damdawi-inah dah luh niin, January 24, 2017 khan lung lam ṭhat lohna vangin a thi a ni.

C Lalruata hi January 4, 1945-ah Kelkang khuaah a piang a, PMG College (tuna PU College) aṭangin BA a pass. Kum 1970-ah politics-ah a lut a, Mizo Union party a zawm. Kum 1972-ah Mizo Union ticket-in Lungpho bial aṭangin MLA atana thlan tlin a ni a, MLA a nih hian kum 27 a ni.

C Lalruata hi pumná avangin January 5, 2016-ah damdawi-inah dah luh a ni a, January 6, 2017 zan dar 1:15-ah a thi a ni.

Tamil Nadu chief minister Jayalalitha Jayaram hi February 24, 1948-ah a piang a, politics a luhchilh hmain film lamah a inhmang a, film 140 chuang a chang hman. June 18, 1982-ah politics luhchilhin AIADMK a zawm a, kum 1983-ah AIADMK ticket-in bye-election-ah MLA atana thlan tlin a ni a, kum 1984-aah Rajya Sabha MP atana thlan niin, kum 1989 thleng MP a ni.

Kum 1989-ah MLA atan thlan tlin leh niin, an state-a hmeichhe zinga opposition leader hmasa ber a ni. An party-in kum 1991-ah INC nen ṭangkawpin sorkarna an siam a, May 12, 1996 thleng Chief Minister a ni. Kum 2011-ah thubuai a neih avangin MLA atan in candidate thei lo mah se, AIADMK-in sorkarna an siam avangin Chief Minister atan an dah tho a ni.

Jayalalitha hi May 23, 2016-ah a ṭum rukna atan Chief Minister atana lak luh leh a ni a; a thih ni, December 5, 2016 thleng khan Chief Minister a ni.