Mizoram GSDP dinhmun zirho

Zoram Research Foun­dation (ZoRF) chuan, nimin khan IPR conference hall-ah 'Perspective on Mizoram Gross State Domestic Product (GSDP)' tih thupuia hmangin symposium an buatsaih a, State Planning Board vice chairman H Liansailova'n a hman pui.

H Liansailova chuan ram sum leh pai leh hmasawnna tehna ber chu GSDP a ni thu sawiin, "Sorkar hotute pawhin ruahmanna an siam dawnin GSDP hi an thlir hmasak ṭhin. Fiscal deficit hnawhkhahna turin duh ang anga tih a rem lo a, GSDP aṭanga en rem hnuah hnawhkhah a ni ṭhin," a ti.

Mizoram GSDP-aH 18.75% chu agriculture sector 18.75% leh industry sector 25.61% chauh thawhchhuah a nih laiin service sector-a thawhchhuah chu 58% zet a ni a, sorkar hnathawkte hlawh chu ram pum innghahna lian ber a ni reng hi economic dinhmun duhawm lo tak a ni," a ti.

Hetih lai hian zirchianna nei mumal loa mi ṭhenkhatin sorkar hnathawk hlawh leh office enkawlna atana kan state sum 70% zet kan hmang ṭhin ni awma an sawi chu a dik lo hle tih sawiin, sorkar inrelbawlna atana hman zat hi pension hlawh te, muster roll rawihna te, autonomous district council leh board/ commission hrang hranga grant-in-aid pek te, medical reimbursement-te huam vekin state sum aṭanga 38% vel chauh a ni tih a sawi bawk.

Resource person Dr. Lalrinchhana, planning dy. adviser chuan GSDP teh chhuah dan chipchiar leh teh fuh a harsat dan leh a pawimawh si dan a sawi a, hmangchang hre chin chuan ngaihven lehzual turin a ngen bawk.

Tun hnaiah India Today chanchinbuin Mizoram GSDP chu India ram state zinga hniam ber a nih thu a tarlan avangin, zir chiang turin he sawihona hi buatsaih a ni.

Sawihona hi Zoram Re­search Foundation Secretary Rochamliana'n a kaihruai a, senior officer (rtd) leh university leh college-a economics leh commerce subject zirtirtu te, thuthar thehdarhtute leh NGO hruaitute an tel.