KHAWTHLIR

High Court sak hun
Nimina Assembly session-ah Law & Judicial minister Lalsawta chuan MNF member Dr K Beichhua zawhna chhangin, Mizoramah High Court puitling sak ṭan thuai a nih tur thu House a hrilh. Lalsawta sawi danin, High Court sakna atan hian Ministry of DoNER hnuaia NLCPR aṭangin sum hmuh a ni a, first instalment cheng nuai 1471.90 chu March 2016 khan hmuh a ni tawh.

Thisen pe
Mizoram Law College chuan nimin khan blood donation camp an huaihawt a, mipa 15 leh hmeichhia 10-te'n Aizawl Civil Hospital tan thisen unit 25 an pe.

Talent Search Result chhuak
SCERT-in November 2016-a pawl 10 zirlaite tan State Level National Talent Search Examination (Mizoram) an buatsaih result chu tihchhuah a ni a; May 14, 2017-a Kendra Vidyalaya, Zemabawka National Talent Search Examination-a tel turin mi 25 an tling.

Police workshop
Lunglei district-a police-te pualin nimin khan Lunglei SP pisa conference hall-ah ni thum awh tur, 'Detection of Crime’ tih thupui zirhona ṭan a ni a, Lunglei SP C Lalruaia'n a hawng. Workshop-ah hian Lunglei district-a police officer 10 an tel a ni.

Biate khua lawm
Biate khuaa V/C, YMA, MUP, MHIP leh MZP-te leh Biate Welfare Society, Aizawl-te chuan thuchhuah siamin, Biate khuain kum tam tak chhung tui harsatna an neih vanga mangang taka an awm lai a, UDPA Minsiter-in Biate Water Supply Scheme hlawhtlin theihna atana hma a laksak avanga an lawmthu an tarlang.

Kal phal loh
SIPMIU chuan vawiin hian SR Vala road, Mission Venga pipe line an phumnaa an tihchhiatte blacktop hna an thawh dawn avangin lirthei kal phal a ni dawn lo. SIPMIU chuan mipuite hriatthiamna an ngen.