Champhai district damdawi-in khâr tintuah

Champhai District NGO Coordination Committee chuan, Champhai District Hospital-a doctor indaih lohna chu April 2017 thla ral hmaa phuhrûk a nih loh chuan damdawi-in hi khâr an tum.

Champhai district NGO-te hian thuchhuah siamin, Champhai District Hospital-a thawktu indaih lohna vanga mipuite'n harsatna an tawh mek chu thuneitute hnenah ṭum eng emaw zat an thlen tawh tih an tarlang a, "Chhanna kan la hmu lo. Hei hi kan district mipui­te ngaihsak tâwk lohnaah kan ngai a ni," an ti.

Champhai NGO-te hian Champhai District Hospital-ah hian surgeon, paediatrician leh nurse mamawh zual pek an phût a; pek an nih loh chuan May 1, 2017 aṭangin damdawi-in khâr an tum a ni.