World Consumer Rights Day hmang

Mizoram Consumer Union (MCU) leh Govt. Aizawl College (GAC)-a Consumer Club-te chuan nimin khan GAC hall-ah World Consumer Rights Day an hmang a; Information & Communication Technology department secretary C Lalhmachhuana khuallian a ni.

C Lalhmachhuana chuan, khawvel changkang zelah consumer-te leh zirlaite'n dan leh thil leitute dikna chanvote an hriat a, humhalh tura an zir peih a ngaih thu a sawi a, "Changkannain a ken tel social network/media-te hi kan nun tichhetu leh zirna tichhe theitu a ni thei a, fimkhur a ngai a ni," a ti.

Inkhawmah hian National Informatic Centre-a system analyst HC Rochungnunga chu resource person niin, World Consumer Rights Day thupui 'Consumer rights in the digital age’ tih a sawifiah.

HC Rochungnunga chuan, digital age-a mipui hriat lâr leh hman lâr internet, online shopping, leh thil dangte'n mihring dikna leh chanvo a tihchhiat dante an ngaihtuah fo a ṭul thu a sawi a, "Online shopping aṭangte hian bum kan tâwk ṭhin a, consumer-te kan fimkhur a ṭul hle. Kan dikna leh chanvo humhalh tur hian Consumer Court, District Forum kan neihte hi hmang ṭangkai ang u," a ti.