Lunglei HPC sum nuai 490 hmanna hmu zo lo

MNF sub-head­quarters, Lunglei hruai­tute chuan, kum 2009 aṭanga 2016 chhung khan Lunglei High Powered Committee (HPC)-in sum a hmanna anga a tarlan zingah Rs. 4,90,26,724.94 hmanna hmuh tur a awm loh thu an puang a; hemi chungchangah hian nimin khan Anti Corruption Bureau-ah FIR an thehlut.

Lunglei MNF hruai­tute hian nimin khan Aizawl Press Club leh Lunglei Press Club-ah thuthar thehdarhtute an kâwm a; RTI Act hmanga zawhna an siam, Lunglei HPC office-in an chhanna aṭanga Lunglei HPC sum sum hman dan dik lo leh sum eirukna a awm ngeia an hriat dante an tarlang.

Aizawl Press Club-a press conference an neihnaah Lunglei sub-hqrs. MNF president Lawmawma Tochhawng chuan, Lunglei HPC sum hmanna hmuh tur awm lote chu kum 2009-2016 chhungin Rs. Rs. 4,90,26,724.94 a ni tih a sawi. Chungte chu vice chairman-a Joseph Lalhimpuia a awm lai, 2009-2013 chhungin Rs. 2,30,34,463.94 leh S Laldingliana awm lai, kum 2013-2016 chhungin Rs. 2,59,92,264 a ni.

Lunglei MNF hruai­tute chuan hna thawh anga tarlan, a taka thawh hmuh tur awm lo eng emaw zat a awm bakah, hna thawh an hmuh zingah pawh sum sên zat nena inmil lo tak tak, uchuak taka sum hman eng emaw zat a awm thu an sawi a; chu'ngte chu a thlalakte press mite an entir a ni.

F Lalsawmkima chuan, Chief Minister ngei chairman-na hnuaia mi Lunglei HPC kaltlanga Lunglei district tana pawisa pek ṭhin aṭanga kum 2009-16 chhungin Rs. 4,90,26,724.94 senna hna thawh hmuh tur a awm lo chu pawi an tih tak zet thu a sawi a, "Mipui pawisa tur, hmanna chin hriat loha bote hi chhui chhuak ngei turin Mizoram sorkar kan phût a, chhui chhuah a nih ngei theih nan ACB-ah FIR kan thehlut a ni," a ti.

CM Lal Thanhawla'n 'Corruption-ah kei leh ka thawhpuite opposition-te'n min beihna tur an hre lo' a tih fo chu a dik tâwk lohzia tarlang turin document dang pawh an phawrh zel dawn niin a sawi bawk. Lunglei MNF vice president F Lalsawmkima, Vigilance-a an chairman ni bawk chuan, Lunglei HPC-in sorkar department 39 kaltlanga Lunglei district-a hna hrang hrang an thawhte an tarlante a hmuna an finfiahnaah, hna an thawh hmuh zawh loh eng emaw zat a awm thu a sawi.

F Lalsawmkima chuan, "Department hrang hranga work scheduled-a awm, utilization certificate leh completion report pawh awm, hnathawh awm lo tam tak a awm," a ti.

MNF-in Lunglei HPC hnathawh an hmuh lohte
* Hna hming Sum sen zat Kum
1. Mamte ME School-III Rs. 2,00,000 2011-12
(Mamte-ah ME School-III a awm lo niin an sawi)
2. Nghasih approach road Rs. 25,00,000 2009-10
3. Lunglei-Nghasih road chei ṭhat Rs. 29,93,000 2014-15
4. Zobawka District Park quarters sak Rs. 8,00,000 2013-14
5. Zobawk M/S bula pavement siam Rs. 12,00,000 2014-15
6. Lunglei DC Complex-a staff quarters 2 sak Rs. 8,00,000 2010-11
7. DC staff quarters 3 sak Rs. 20,25,000 2013-14
8. Thingfal khuaa water reservior siam Rs. 10,00,000 2015-16
9. Hnahthiala ADHO quarters sak Rs. 5,00,000 2011-12
10. Nunsury-a Guest House sak Rs. 2,00,000 2014-15
11. Uksasury-a khelmual siam Rs. 2,00,000 2014-15
12. Puankhai khuaa khelmual zauh Rs. 2,00,000 2014-15
13. Lunglei Venghluna retaining wall siam Rs. 2,00,000 2013-14
14. Sertlangpui leh Mualṭhuam inkara Rs. 1,50,000 2010-11
Tlawng lei thawm ṭhat