Agri. & Horticulture product processing unit A tam thei ang kan din ang - ZNP

ZNP chuan nimin khan KT Resort, Selesihah political training an nei a; resolution pass in, "ZNP kan sorkar hunah Mizorama kut hnathawktute beidawnna tibo turin Agriculture & Horticulture product processing unit a tam thei ang din a nihna turin private entrepreneur-te nen thawkhoin, hma chak taka lak a ni ang," an ti.

ZNP political session-ah hian an general headquarters leh Aizawla ZNP Block hruai­tute an tel a, ZNP president Lalduhoma’n a hmanpui. Lalduhoma'n thu a sawi bakah, vice president Dr Kenneth Chawngliana'n political training a neihpui a ni.

Dr Kenneth Chawngliana chuan, “Hmasawnna lama state dangte ûm phâk tur chuan hmasawnna hi chak taka kalpui satliah ngawt a tawk tawh lo a, a chak thei ang bera tlânpui a ngai tawh zawk," a ti a; ZNP chu kalphung thar hmanga Zoram thar dan leh hraite a nih dan tur ang taka hmang ngam sorkar ṭha leh chak, hna tak tak thawk thei tur din tumtu an nih thu a sawi.

ZNP political training-ah hian resolution point pathum an pass a; Mizorama maute nasa takin tawlhrûk a ni reng leh sorkarin a véng zo lo chu an ui thu tarlangin, "Titawp turin kan sorkar hunah a rang thei ang berin Mizoramah paper mill kan din ang a, chhung­kaw tam takin mau hmangin ei an zawng thei ang," an ti.

"Chief minister lo chelh tawhtute’n kan ram hi kum 30 chhungin tun dinhmun hi min thlen theih ṭawk a. Kum 2018 inthlanpui lo awm turah hian a ngai bawk kan thlan tlin leh chuan kan ramah 'change' a thleng thei dawn lo. Chuvangin, kan ramah 'change' a thlen theihna turin kan mithiam leh ṭhalai rualte lo pên chhuak turin kan ngen a ni," an ti bawk.