Computer hman dan zirtir

State Agriculture Manage­ment & Extention Training Institute, Mizoram chuan Nilaini khan NeGPA, Agriculture Complex-ah On-Campus Training on Apprenticeship in ICT for Middle Level Officers' an buatsaih a, Agriculture addl. secretary Vanlalrawni-in a hawng.

Vanlalrawni chuan, Central sorkarin Digital India a kalpui dan avang te, report and return kalpui a nih dan avangte leh thil engkim mai internet hmanga online a tih zel a ṭul tak avangin officer-te pawh IT lama a intuai­hriam zel a ṭul thu a sawi.

Training kaihruaitu SAMETI director RK Nithanga chuan sorkar officer-te tana computer thiamna neih a ṭul takzet thu leh chumi kawnga intuaihriamna hun ṭha neih theih a ni vanneihthlak a tih thu a sawi bawk.

Ni thum chhung awh tur training-ah hian Agriculture dept.-a officer-te hi office hnathawhna atana computer hman dan chi hrangte zirtir an ni ang a, National e-Governance Policy-Agriculture aṭanga siam Computer Laboratory-ah practical class an nei nghal zel dawn a ni.