MPC party mite'n PC sorkar laia Sawhthing sawngbawlna an enfiah

MPC party mite chuan March 16, 2017 khan PC sorkar laia sawhthing hriak sàwrna leh sâwngbàwlna hmunpui, Sairang rama an bun, tuna hlam­chhiah tawh chu a hmunah an enfiah a; sawhthing sawngbawlna chu PC sorkar hmalakna a nih vanga Congress party sorkarin an chhunzawm duh tâk loh a nih thu an sawi.

Sawhthing sawngbawlna hmun an enfiahnaa hruaitu HB Lalnunthara, MPC general secretary chuan, Brig. T Sailo kaihhruai PC sorkarin kut hnathawktu, a bikin sawhthing chíngtute'n an thawhrim rah manhla taka an seng theihna tura sawhthing hriak sàwrna leh sawngbawlna hmunpui, Sairang Buichali rama mi chu hun eng emaw chen ṭangkai taka hman a ni tawh tih a sawi a, "Congress leh MNF party-te'n sorkarna an chelh chhungin an chhunzawm duh loa an hluihlâwn avangin ram leh hnam hmasawnna tihṭhuanawpna lian tak a ni," a ti.

MPC thuchhuah chuan, sawhthing sawngbawlna chu Congress leh MNF party-te'n an sorkar chhungin chhunzawm se chuan, sawhthing chingtute'n harsatna tam tak an tawh ṭhin chu pumpelh a nih tur thu an tarlang bawk.