Grape wine inmansak hi Champhai leh khaw chhak tlangdung inhmuhsitnaah kan ngai - Champhai NGO

Champhai District NGO Coordination Committee chuan thuchhuah siamin, Champhai leh Hnahlana grape wine siam chhuahte sorkarin a mansak chu pawi an tih tak zet thu leh Champhai leh khawchhak tlangdungte hmuhsitnaa an ngaih thu an tarlang.

Champhai Joint NGO chuan, "Grape chíngtute'n káwla ni chhuak chhiar a, a súr a sa hnuaia hma an lo laknain rah a chhuah ve ṭan a, an hmalakna awmze nei zawk chantir tuma an remhriatna hmanga grape sawngbawlna an buatsaih, ṭanpuina awm thei ang dap kual a, loan a pung awma risk sang tak an lo lak venate engmah loa chantir a, sorkarin an hralh chhuah tur an lo man sak hi pawi kan ti tak zet a ni," an ti.

NGO-te chuan, "Kut hnathawktute'n anmahni remhriat anga kan boruak leh leilung mil grape chíng a, an thar chhuah hmanga eizawnna ngêlnghet an zawnna kawnga harsatna an tâwk hi pawi kan ti tak zet a, Champhai leh khawchhak tlangdungte min hmuhsitna ang hialah kan ngai a ni," an ti a; intodelhna tura tlang ram lo neih bànsana eizawnna ngêlnghet nei tura mipui tana party leh ministry anga flagship programme-te chu 'Zûntei nu siam ang mai' a nih thu an sawi.

Champhai district NGO-te chuan, "Mizoram UT kan nih hnu kum 50-ah pawh chàwm hlâwm state nih reng hi hnam ang pawhin a zahthlakin a mualphothlak tak zet niin kan hria," an ti a; Mizoram sorkarin kum tin lo neih bànsan a duh a, ram tihchereu a phal lo a, mipuite dinchhuah a duh tak zet a nih chuan, grape chíngtute thar chhuah suma chantirna kawnga harsatna siam lo tura phûtin, "An thawh ang phu tâwk hlâwkna an tèl ve theihna kawng dappui zawk turin sorkar kan phût a ni," an ti.

"Eibàr zawnna kawnga mipui an rûm a, an mangan laia chhawmdâwl aia an harsat mangan hnua ṭawngkama inhnemna chhâk chhuah ai chuan, kut hnathawktute thawh chhuahin hlâwkna a neihna tura kawng zawnpui hi sorkar tih turah ngaiin kan phût a ni," an ti bawk.