SBI-in Gpay an hriatpui lo

State Bank of India (SBI) hotute chuan, Google Pay (Gpay) appli­cation hmanga pawisa inthawn chhâwn chu SBI-in a hriatpui loh thu leh Gpay hmanga pawisa inthawn kualah buaina a awmin an puih theih loh thu an sawi.

State Level Banker Meet Committee Mizo­ram hotute chuan June 4, Inrinni khan Aizawl Press Club-ah thuthar thehdarhtute an kâwm a; an press conference hi Ministry of Finance leh Ministry of Corporate Affairs-te'n Azadi Ka Amrit Mahotsav puala June 6-11, 2022 chhunga Iconic Week lawmna tur puala neih a ni.

State Level Bankers Committee coordinator Lalnilawmi, SBI Regional Office chief manager ni bawk chuan zawhna chhangin, Gpay chu Mizorama sum inthawn kualna atana hman lâr tak a nih thu sawiin, "SBI-in a pawmpui application a ni lo a, sum tihchêt vel (transaction) phalna a pe lo. Chuvangin, Gpay-a sum inpek sual leh harsatna hrang hrang awm ṭhinah SBI chuan engmah kan ti thei lo," a ti a, SBI chuan Yono an neih thu a sawi.

Iconic Week pual hian Chanmari YMA Hall-ah Lok Sabha MP C Lalrosanga hoin hun hman a ni dawn a, bank kaltlanga sorkar hmalakna hrang hrang puanzar leh tihchhuah a ni dawn. Week chhung hian sorkar laipuia department hrang hrang hotute’n hun an hmang ṭhin dawn a ni.