HFW Minister Dr R Lalthangliana'n Delhi-a damdawi-in hotute a kâwm

Health minister Dr R Lalthangliana chuan June 3, 2022 khan Mizoram sorkarin New Delhi-a damlo enkawlna atana a thlan damdawi-in pathum - Max Super Speciality Hospital, Fortis Escort Hospital leh Indraprastha Apollo Hospital-te a tlawh a, damdawi-in hotute a kâwm.

Dr R Lalthangliana chuan, Mizoram aṭanga phai damdawi-in pantu damlote chu mi chi hrang hrang leh dinhmun inang lo tak tak an nih ṭhin thu a sawi a; ṭhenkhat chu ṭawng thiam lo leh sum leh pai lama harsatna neite an nih ṭhin avangin hriatthiamna thui tak nen lo dawngsawng ṭhin turin a ngen.

Delhi-a thite ruang Mizorama thawn haw ngaiah harsatna a awm ṭhin thu sawiin Health Minister chuan, "Post mortem leh damdawi-in lamin an tihfel ngaite nghah chhung a rei ṭhin a, thlawhtheihnaa ruang thawn a nih dawn phei chuan hmanhmawh leh hnawhsarum taka thil tih a ngaih ṭhin avangin a buaithlak hle," a ti a, a awlsam zawnga thil tihfel dan zawng turin damdawi-in hotute a ngen bawk.

R Lalthangliana chuan, Mizoramah super specialist doctor an la tlem thu sawiin, "Department pawimawh ṭhenkhatah phei chuan tu mah kan nei lo. Department pawimawh, Mizo damlo tamna cardiology, cancer, nephrology, neurology, endocrinology leh a dangtea in doctor thiamte hi Aizawlah free clinic rawn neihtir turin ka ngen che u a ni," a ti. Damdawi-in hotute pawhin ṭha an tih thu leh tih theih dan tur an ngaihtuah dawn thu an lo hrilh.

Health Minister chuan, damdawi-in thuneitute chu an damdawi-inah Mizoram doctor-te training neihpui ṭhin turin a ngen a; Mizoram House-a sorkar official-te thu leh hla chu Mizoram sorkar thu leh hla tluk a nih avangin damlo an buaipuina leh thihna chungchangah lo ngai pawimawh ṭhin turin a ngen bawk.