KHAWTHLIR

Thisen pe
KṬP, Vaivakawn Vengthlang Branch chuan an din champha pualin June 4, Inrinni khan an kohhran hall-ah thisen pek an huaihawt a, KṬP member mipa 27 leh hmeichhia palite'n Synod Hospital tan thisen unit 31 an pe. Congregational Church of India (Maraland) KṬP Bial no. II, Siaha pawhin Siaha District Hospital tan thisen unit 30 an pe a, petute mipa 22 leh hmeichhia pariat an ni.

MCAB-in lawm
Mizoram Cooperative Apex Bank Ltd. chuan May 4, Inrinni khan an Head Office-ah RBI-in mobile banking license a pek thar lawmna an hmang a, MCAB chairman T Lalmuanpuii'n a kaihruai. Mobile banking hi thla 1-3 chhunga hman theih tura beisei a ni.

SEDP zirho
Aizawl District SEDP Committee chuan June 3, 2022 khan Tlangnuam leh Aibawk RD Block huam chhunga khaw 32-a Village SEDP Committee member-te tan Chanmari YMA Hall-ah Family Oriented SEDP chungchang inzirtirna, Orientation cum Sensitization Training an buatsaih. Chhungkaw thleng tur SEDP sem dan tur leh dawng thei turte an inhrilhfiah a ni.

Plastic sawngbawlna
PHE department hnuaia RWD, Lunglei-in Luangmuala Plastic Waste Management Centre an din chu June 4, Inrinni khan PHE chief engineer C Chawnghnuna'n a hawng. Centre-ah hian plastic sâwngbàwlna kháwl pahnih - plastic hraw her sawmna leh plastic sakhata siamna/nem muktu dah a ni a; plastic sakhatte chu plastic vêk hmangin hmanraw ṭangkai zawk siam nan hman leh tur a ni.