Mi dik lote hnâwl turin mipui chah

Hachhek bialtu MLA Lalrindika Ralte chuan, "Ram kan hruai duh dan en hian Pathian ruat kan ang lo ṭhin," a ti a, mi dik lote hnâwl turin mipui a chah.

Lalrindika Ralte hian MPCC Ṭomir Fehchhuah hmangin kar liam ta khan a biala khaw hrang hrang - Dârlâk, Búnghmun, Thaidawr, Mualṭhuam leh Belkhai bakah, Tripura Jampui tlangdunga Mizoram lam chan khua - New Kawnpui, Zomuantlang leh Phuldungsei khuate a tlawh. MLA hi VC-te leh khawtlang hruaitute nen an inkâwm a ni.

Lalrindika Ralte chuan, tunlaia ram hruaitute chu Pathian ruat an ni vek ta lo em ni tih tur a ni fo tih sawiin, "Ram kan hruai duh dan en hian Pathian ruat kan ang lo ṭhin. Pathian ruat kan ni, tia kan dik lohnaah pawh sawisel thiang lo anga kan indah a nih phei chuan a dik hauh lo ang," a ti a; sorkar pawisa chu mipui pawisa a nih avangin fimkhur taka hman a ngai a, party fund a nih loh avangin politics khelh nana hman tur a ni lo tih a sawi.

Mi dik lote hnâwl tura mipui chahin Lalrindika chuan, "Hmasawnna hnathawh tiṭhuanawp vek khawpa ram hruaitute leh hnathawktute kan hlemhle duh hi a makin a pawi tak zet. Mahni dinhmun siamṭhat nan chauha politics khel ṭhinte hi ram leh khawtlang hmelma an ni a, kan hnâwl ngam tur a ni. Kan hnawl ngam lo a, therhlo ît vang ringawta hetiang mite kan la thlang tling fo a nih chuan a thlang tlingtu mipui mawhphurhna a ni thui hle ang," a ti.