HSLC leh HSSLC pass-te lawmpui

Aizawl South-I bialtu MLA C Lalsawivunga chuan June 4, Inrinni khan a bial chhunga Republic Veng leh Republic Vengthlangah HSLC 2022 result chhuaka pass-te lawmpuina a hlân. MLA chuan, "Zo fate all India services leh central services-a an tlem tawh lutuk hi a manganthlâk a, tum neia lekha zir turin tih tak zetin ka ngen a ni. Ka bial chhungah he lama inziak tling thei an awm a nih chuan an senso kan re-imburse ang," a ti.

Pine Mount Higher Secondary School chuan Inrinni khan kumin HSLC leh HSSLC-a pass-te lawmna inkhawm an buatsaih a, Lok Sabha MP C Lalrosanga leh Aizawl bawrhsap Dr Lalhriatzuali Ralte ten an hmanpui. HSSLC Arts-a parukna Vanlalrinzuali, Pine Mount HSS chu lawmpuina scooter pek a ni.

C Lalrosanga chuan, "Zirna-in ṭha a lut leh tur chuan mark neih ṭhat a ngai a, mark nei ṭha tur chuan in thawhrim a ngai. Thawhrimna chu hlawhtlinna in a zui ṭhin a ni," a ti

CLS Academy pawhin Inrinni vêk khan Ajal Club-ah zirlaite lawmpuina hun an hmang a, bialtu MLA VL Zaithanzama'n a hmanpui. MLA chuan, zirlaite chu anmahni leh chhungkaw tan chauha zir loin, Mizoram tan theihtawp chhuaha zir turin a fuih a, "Mizo ṭhalai central service lamah kan nei ta meuh lo. Mizorama zirlai mekte hian central service-a inziak tling thei khawpa thiamna leh taimakna kan neih hi a pawimawh hle a, central service lama kal turin zirlaite'n rilru i nei ang u," a ti. CLS Academy hi Nursey Vengah a awm a, kum 2018-a din a ni.