Hripui vei enkawl mek mi 101 an awm

Mizoramah Covid-19 vei June 3, Zirtawpni khan mi 19 leh June 4, Inrinni khan mi pakua hmuh belh a ni. Inrinni khan mi 22 leh nimin khan mi panga chhuahtir an ni a; June 3 khan hripui vangin mi pakhat a thi. Hripui vei enkawl mek mi 101 an awm.

June 3, Zirtawpnia Covid-19 positive hmuh chhuahte chu mipa 11 leh hmeichhia pariat an ni a; Rapid Antigen Test hmanga hmuh chhuah vek niin, positivity rate 9.55% a ni. Inrinnia Covid-19 vei hmuh tharte chu mipa pali leh hmeichhia panga an ni a; RAT hmuh chhuah vek niin, positivity rate 3.54% chiah a ni.

Covid-19 vei enkawl lai Zoluti (57), Thingdawl, Kolasib district chu June 3 zan dar 10:11 khan State Referral Hospital-ah a thi a, hripui vanga thi 700-na a ni a; natna dang nei tel a ni.

IDSP record angin, Mizoramah Covid-19 vei 2,28,400 hmuh chhuah a ni tawh a, mipa 1,06,341 leh hmeichhia 1,22,059 an ni a, mipa aiin hmeichhia 15,718-in an tam zawk. Nimin tlai dar 5 thleng khan mi 2,27,599 (99.65%) chhuahtir an ni tawh a, mi 700 (0.31%) thi tawhin, enkawl mek mi 101 (0.04%) an awm.

Nimin tlai dinhmun angin, Mizoramah hripui vei enkawl lai tamna ber Aizawl district-ah mi 29 an awm a, district pathum - Siaha, Champhai leh Lawngtlai district-ah hripui vei an awm tawh rih lo.