Two wheeler hnunga chuangte tana Helmet khum tur tih kengkawh lo

Transport minister John Rotluangliana chuan, two wheeler khalh­tu leh an mi phurh (pillion rider)-te helmet khum ngei tura notification tih­chhuah chu a takin ken­kawh a nih loh thu a sawi.

MNF member Vanlal­zawma zawhna kal zelah Transport Minister chuan, "Pillion rider-te helmet khum tura tih hi Supreme Court-in tih ngei ngei tura a tih avangin zawhnate kan dawng a, zêp thu a awm lo. Khuti lam atana inchinfelna atan notification hi chhuah a ni," a ti. Two wheeler khalhtu leh an mi phurhte'n helmet an khum ngei tura tihna notification hi Transport Secretary-in January 12, 2017 khan a tichhuak a ni.

John Rotluangliana chuan Vanlalzawma zawh­na chhangin, two whee­ler taxi permit mi 221 hnenah pek chhuah a nih tawh tih a sawi a, "Taxi atana two wheeler lei tawh zat hriat theih a ni lo a, in register tawh chu 24 an ni," a ti.

Transport Minister sawi danin, two wheeler taxi-te tan hian rate siam a ni tawh a, stand hranpa erawh siamsak a ni lo. Stand siam chu Transport department kut a ni lo a, AMC thuneihna a ni.

Two wheeler taxi-ah hian hmeichhe khalhah chuan hmeichhia chauh an chuang thei ang tih chu hlauhthawn thilah tih a nih thu sawiin John Rotluangliana chuan, hei hi ennawn tum a nih thu House a hrilh.