Hindi zirtirtute'n dah ngheh an phût nawn

Mizoram CSS Hindi Teacher Association (MCHTA) hruaitute chuan nimin khan Aizawl Press Club-ah thuthar thehdarhtute an kâwm a; Mizoram sorkarah dah ngheh vek an phût thu an puang nawn.

MCHTA president Lalchunglura chuan, sorkar official leh tlawm­ngai pawl aiawhte nena an dinhmun chungchang New Delhi-a an zir chiannah, plan period a tawp tawh chuan extension hi thil theih loh a nih thu an hriat thu a sawi a, "Scheme thar anga kal a ngaih tawh thu leh hemi atan hian a thara lak (new recruitment) a ngaih tawh thu leh scheme tharah mi 1,305 lak kan nih dawn leh dawn loh pawh hriat a nih loh thute kan hria a ni," a ti.

Lalchunglura chuan, kum 2017-18 budget-a cheng vbc. 125 awm pawh Mizoram chan tur chiah a nih loh thu sawiin, "State pali Nagaland, Mizoram, Panjab leh Orissa-a sem tur niin, heta ṭang hian Mizoram hian vbc. 45 a chang dawn a a, chu pawh new scheme-ah min dah tel ve ngei ang em tih a chiang lo," a ti a; scheme chu him tawk loa an ngaih thu a sawi.

New scheme-a a kal tawh dawn avangin Mi­nistry of Human Re­sourses Development (MHRD) chuan language teacher-te chu an awmna state sorkar hnenah la lut (absorb) vek tura a hriattir thu sawiin Lalchunglura chuan, "Mizorama Edu­cation Secretary hnenah pawh lehkha pek a ni tih MHRD aṭangin kan dawng. MHRD lehkha ang hian Mizorama CSS Hindi zirtirtu mi 1,305-te hi state plan-ah min dah turin kan phût a ni," a ti.

Hindi zirtirtute sawi danin, Punjab-a CSS language teacher-te chu an state sorkarin kum thum dan zelah an inrêlbâwlna a kalpui ṭhin. Language teacher-te chu kum 2011-ah chawlh lailâwktir an ni a, kum 2012-ah kum 2015 thleng extension a pe a, state sorkar chuan a intiam angin, tunah hian language teacher 487-te chu dah ngheh mai tur dinhmunah an ding a ni.

Ngaland-a CSS Hindi teacher mi 1,379-te chu March 31, 2017-ah plan period a tawp dawn avangin MHRD chuan absorb turin state sorkar a hriattir. Nagaland Hindi zirtirtute hian dah ngheh phûtin March 15 aṭangin tiamchin awm loin nawrhna an kalpui a, dah ngheh an nih leh nih loh chungchang chu March 17-ah Cabinet-in a ngaihtuah dawn.

Central YMA hriat­puinain, 'Extension hi a hlawhtling lo a nih chuan state sorkarin a theih angin hma a la ang' tiin Mizoram sorkar nen inremna an siam thu sawiin Hindi zirtirtute chuan, "Mizoram sorkar nena kan inremna angin sorkar chu a thutiam tihhlawhtling turin kan phût tlat a ni," an ti.

Mizoram CSS Hindi teacher-te hian March 21, 2017 hian inkhawpui an hmang dawn a, chutah chuan an kal zel dan tur an ngaihtuah dawn a ni.