Ruihhlo Rs. 2,55,17,849 hû hâl ral

Excise & Narcotics department (END)-in ruihhlo an man sa Rs. 2,55,17,849 chu, nimin khan an department-a Drugs Disposal Commi­ttee ruahmanna angin END commissioner Lalhmun­sanga'n Bawngkawn Bri­gade Field bulah a hâl ral.

Nimina ruihhlo an hâl ral takte chu - heroin kg. 2.652, ganja kg. 368.881, Pseudoephedrine mûm 22,54,376, Alprazolam mûm 1,450, Parvon Spas mûm 12,033, Spasmo Proxyvon mûm 120, Ketamine 19,843, Opium kg. 15.426, Tramadol mûm 59 leh Zolpidam mûm 23-te a ni.

Excise commissioner Lal­hmun­sanga chuan, dan zawm a him ber tih sawiin, ruihhlo donaah pawh dan hnuaiah, dan ang zela thawk zel turin END-a thawktute a chah a, "Dan kan zawm ṭhin avangin kan tlo a ni. Ruihhlo kan man hian mi tam tak nunna a chhan ṭhin a ni," a ti.

Lalhmunsanga chuan, Excise department-in ruihhlo do hna an thawhnaah an department mi pathumin nunna an chán tawh tih a sawi a; nimina hâl ral tak ruihhlote chu June 2016 hnu lama man, Court-in tihral tura a tih tawhte a nih thu leh, an man tawh sa, Court-in tihral tura a la tih loh eng emaw zat a awm thu a sawi bawk.