KHAWTHLIR

Thisen pe
Phulpui Branch KṬP chuan nimin khan an Kohhran hall-ah blood donation camp an huaihawt a, Synod Hospital tan mipa 23 leh hmeichhia pakhatte'n thisen unit 24 an pe.

Resolution pass
Nimin Assembly session-ah INC member T Sangkunga resolution put luh, 'Mizoram state-in All India Services (IAS, IPS, IFS) seperate cadre a neih ve ngei theih nan theihtawp chhuah rawh se' tih chu member hrang hrangte'n an sawi hnuah pass a ni.

Border haat
Commerce & Industries minister H Rohluna chuan MNF member Lalrinawma zawhna chhangin, India leh Myanmar insumdawn tawnna kal zelah Mizoram chhungah Hnahlan, Vaphai, Zote leh Pangkhuaahte Border Haat siam tum a nih thu House a hrilh.

Minister-in hmanpui
Minister Lal Thanzara chuan Ningani zan khan Mualvûma Awithangpa group YMA conference a hmanpui a; thu sawiin, YMA chu kohhran leh political party ramri khamin a dâl ngai loh, ram leh hnam kawng hrang hranga humhalhtu a nih thu a sawi. Awithangpa group-ah hian YMA branch 13 awmin, nikum khan member 5,035 an awm a ni.

Rural camp nei
Mizoram University-a Social Works department-a second semester zirlaite chuan Mamit district-a Ṭuahzawl khuaah rural camp an nei mek a; nimin khan Mamit district-a Krishi Vigyan Kendra nen ṭang dunin kut hnathawktute tana hmasawnna tur leh thlai enkawla tihral dan kawnghmang inzirtirna hun an buatsaih.

Sikul hawng
Khawlailung Presbyterian English School building thar chu nimin khan Serchhipa Education officer Lawmawma'n a hawng. Building thar hi RCC chhawng a ni a, class room 12 awm theihna a ni. Khawlailung PES-ah hian KG aṭanga pawl 10 thleng, zirlai 172 an awm mek a, zirtirtu leh hnathawktu dang mi 12 an awm bawk.