Sorkarin zu a sawi mawi ngai lo - Excise & Narcotics Minister

Excise & Narcotics minister R Lalzirliana chuan, Congress party leh an party kaihhruai Mizoram sorkarin zu an sawi mawi ngai lo tih a sawi a, "Zu hi kan sorkar chhungin kan zuar reng dawn ka ti lo," a ti.

Nimina Congress Bhavan-a inkhawmah MPCC president R Lalzirliana chuan thu sawiin, "Zu hi Congress leh he sorkar hian ṭha tiin a sawi mawi ngai lo hrim hrim a, Total Prohibition kan neih laiin zu a awm lo chuang lo a, a awm chhun a chhe em em bawk a. Chuvangin, kan kal dan phung thlakin ko i'n thlak teh ang u, a ti ve mai chauh a ni," tiin a sawi.

R Lalzirliana chuan, zu chung­changah a changtu minister a nih ang phei chuan zu zawrh chhuah hnu aṭanga Krismas leh kum thar thleng turte pawh a huphurhawm hle ṭhin tih a sawi a, "Chutih laiin, khap bur lai ai maha muanawmin Krismas leh kum thar vawi hnih kan hmang thei hi a lawmawm hle. Buaina hranpa kum dang ai maha tlem zawk an ni chhote hi mi mak tih a ni zawk hial a ni,” a ti.

Excise & Narcotics Minister chuan, "Zu hi kan sorkar chhungin kan zuar reng dawn kan ti lo. Kan hotupa ber sawi tawh angin, kan en zui zel a, kan zir zel ang a, kan hnam leh ram tan ṭha lo leh mualphona tur a nih dawn chuan kan hnûkkîr leh mai ang a lo tih tawh angin, a zir chiangtu turte ruat tawh an ni," a ti. A zir chiangtute thutlukna ang chuan an kal mai dawn a, eng pawh lo thleng se, tlàwmah tuma’n lak loh tur tih sawiin, "Kan titawp a nih pawhin kan thutiamah kan ding tihna a ni ang,” a ti bawk.

MPCC thuchhuah chuan, nimina an party pisaa inkhawmah hian MNF aṭangin Tuivamit Local Council vice chairman Vanlalngura leh secretary Vanrammawia te Congress party-ah an lawm lut niin an tarlang.