Kawng siamna atana dah MNF MLA-te'n a tam an ti

MNF member K Sangṭhuama leh Lalruatkima te chuan, Ramrikawn to Lungverh kawng siamna atana estimate sanction chu a tam hlea an hriat thu an sawi.

K Sangṭhuama zawhna chhangin PWD changtu, chief minister Lal Thanhawla chuan, Ramrikawn-Lungverh (NH-54 thleng) kawng km. 7.758-a thui chu NABARD loan hnuaiah kum 2016-18 chunga siam ṭhat tum a nih thu a sawi a, "Estimate sanction chu cheng nuai 931.86 a ni. Tender koh a ni tawh a, contractor Lalfamkima, Ramhlun North thlan a ni a, hna ṭan a tum mek," a ti.

K Sangṭhuama leh Lalruatkima te chuan, kawng siamna atana sum sanction chu a tam avangin, kawng tihzauh (widening) hna thawh tel theih ngei ni se an duh thu an sawi.

Hemi chungchangah hian CM chuan, "Widening tih chi-ah kan ngai lo. Project cost lêt vel compensation a ngai dawn. Compensation kan phût lo ang an ti a nih chuan widening hna kan thawk nghal ang, compensation a sang lutuka kan tlin lo," a ti.