Mizo Carbon Product dilna Sorkar laipuiah thehlut tawh lo

Assembly budget session kal mekah Commerce & Industries minister H Rohluna chuan, M/s Mizo Carbon Product-in central transport subsidy (CTS) dil mek Rs. 10,34,82,311 an nei a, mahse, Mizoram sorkarin sorkar laipuiah a thehluhsak loh thu a tarlang.

MNF member Dr K Beichhua zawhna ziaka Commerce & Industries Minister-in a chhan danin, Mizo Carbon Product-te hian central capital investment subsidy (CCIS) Rs. 93,90,361 leh CTS Rs. 2,47,74,725 an la tawh a ni. CTS hi Rs. 10,34,82,311 an dil leh a, mahse, State Level Committee-in a recommend loh avangin an dilna hi sorkar laipuiah thehthlak a ni lo.

Mizorama lungalhthei leh thil dang Mizo Carbon Product-te'n an phur lut anga department-a an thehluh dan zawhna chhangin H Rohluna chuan, "Lungalhthei leh thil dang Mizorama phur lut anga an thehluh dan kimchang hi Anti Corruption Bureau, Mizoramin an claim document-te an kawl vek avangin hriat theih a ni rih lo," a ti.