KHAWTHLIR

Thisen pe
Inrinni khan Aizawl Civil Hospital tan Bethlehem Vengthlang branch YMA-in thisen unit 81 an pe a, a petute mipa 62 leh hmeichhia 19 an ni a; Chawlhhmun unit ṬKP pawhin an silver jubilee pualin unit 25 an pe a, a petute mipa 17 leh hmeichhia pariat an ni. Mizoram UPC PYD, Kolasib bialin Kolasib District Hospital tan unit 45 an pe a, a petute mipa 33 leh hmeichhia 12 an ni a; Bawngkawn Pastor Bial KṬP-in Synod Hospital tan unit 35 an pe bawk.

Jubilee lawm
Baptist Church of Mizoram, Zobawk Bazar Kohhran chuan March 18 aṭang khan an koh-hran golden Jubilee an lawm mek. Nimin khan golden jubillee monument an siam chu BCM general secretary Rev. F Ramdinmawia'n a hawng a; vawiin hian jubilee lawmna ruai an ṭheh dawn a ni.

Ganja man
Excise & Narcotics department-a Anti Narcotics Squad-te chuan, March 17, 2017 zan dar 10:55 khan Rangvamual Mel 3-ah ganja kg 20.150 leh neitua puh - Zamkhawgin (45) s/o Zamkhanning (L), Lamka, Churachandpur, Manipur leh, Lalsangzuala (31) s/o Laldenlien, NE Tlangnuam, Mizoram nia inchhálte an man.

Lungphùm phúm
Edenthar Veng Community Complex din tur lungphùm chu Inrinni khan bialtu MLA Lal Thanzara, minister-in a phúm a, thlanmual kawng, thlanmual in leh kawng siam thar dangte a hawng nghal. Edenthar Community Complex hi cheng nuai 417 sénga sak tur a ni.

Spring Fair khâr
Hnam Chhantu Pawlin March 14, 2017 aṭanga Vanapa Hall-a Spring Fair 2017 an buatsaih chu Inrinni khan khar a ni a, a kharna inkhawmah MJA president Vanlalrema Vantawl khuallian a ni. MJA President chuan, khawvel huapa Mizoram chawi lâr theitu chu handicraft a ni tih sawiin, "Kan culture a nun reng theih nana hmanraw ṭangkai ber zinga mi chu handicraft hi a ni," a ti.