K Deposit-a dahte pe chhuak ve zel kan dah tam hman viau - Finance dept.

Finance department hotute chuan, K Deposit-a sum dahte a theih ang angin an pek chhuah mek zel thu an sawi a, "A awm tam hman lutuk a, K Deposit-a awm mek pawh a la tam lo thei lo," an ti.

Vanglaini palai zawhna chhangin Finance department hotute chuan, Covid-19 avanga sorkar laipui aṭanga sum hmuh tur angte hmuh a nih loh avangin budget-a pass tawh si cheng eng emaw zat an dah thu an sawi a, "Loh theih lohin central aṭanga pawisa kan hmuh miau loh avangin K Deposit-ah hian sum dah a ngai a ni," an ti a, financial year liam ta tàwp dawnah cheng eng emaw zat an dah leh thu an sawi.

Finance department hotute chuan, K Deposit-a sum awmte chu an pek chhuah mek zel thu sawiin, "Kan dah tam hman êm avangin a la awm pawh a tam lo thei lo," an ti a; harsatna eng emaw a awm a nih loh chuan an pek chhuah theih zel an rin thu an sawi.

Mizoram sum dinhmunin ziaawm lam a pan chhoh mek nia sawiin Finance hotute chuan, "Sum thawh chhuah kan neih tam miau loh avangin kan sum dinhmun erawh ṭha tak a ni thei dawn lo hrim hrim. Tunah chuan Treasury-te pawh an daily ceiling pangngai an pe chhuak thei tawh a, hemi piah lam ṭul bik pawh Finance department phalnain pek chhuahtir an ni," an ti.

Finance department hotute sawi danin, sorkar hnathawk hlawh chu dan pangngai angin pek zel theih a nih tawh beisei a ni.