Lungsena SEDP-a fu chî semah Ṭha tâwk lo a tam, la ling lo an awm
Lunglei district chhung, Lungsen khuaa chhungkaw 14 hnenah May 21, 2022 khan SEDP hnuaiah fu chi sem a ni a, fu chi chu tun thlenga la ling lo an awm bakah, ṭha tâwk lo a tam nia thu dawn a ni. Hetih lai hian, fu huan siam uar khua - Phulpui, Lungleng leh Khawlailungah chuan March leh April thlaa fú an ling tlangpui.
Lungsen aṭanga thu dawn danin, SEDP hnuaia fu chìn thlangtu chhungkaw 14 hnena fu chî pekte chu a ṭhat tâwk loh bakah, chìn hun a pelh tawh avangin an ling mumal lo a; fu chî an dawnte chu a hlui tawh bakah a mit ṭha lo a tam a, chìn tlak loh a tam thu fu chi dawngtute chuan an sawi a ni.
Fu chi ṭhenkhat chu chin tlaka an ngaih loh avangin a dawngtute'n an paih nual a; fu chi dawngtu ṭhenkhat chuan, a chi ṭha lo (a mit ṭha tawh lo) a tam a, bi 4,000 siam chhuak tur chuan a ngaihna a awm lo a, bi 200 pawh siam chhuah a harsat tur thu Lungsen Post an hrilh.
Lungsena chhungkaw 14-in fu chi an dawn a ṭhat loh thu media-a tarlan a nih hnuah fu chi dawngtute chu an inhmu khawm a, chumi hnuah
fu ling an awm a, mahse, tun thlengin an la ling vek chuang lo niin Lungsen aṭanga thu dawnna chuan Vanglaini a hrilh a, "Rùn dâlah an chíng a ni ber a, a ṭhen chuan an la chíng chuang lo," a ti.
Fu lin hun tlangpui
Hetih lai hian, Lungsena fu chi sem chhuah hun May 21, 2022 chu Lungsen leh khaw danga mite'n fu an lo chin ṭhin
dan ngaihtuahin, thla khatin a tlai tawha hriat a ni. Lungsenah hian tun hma aṭanga fu huan nei tlem azáwng an awm a, April thlaah an ling
tlangpui.
Fu uarna khua Phulpui pa pakhat chuan, an khuaah chuan April thlaah fu an lin tlangpui thu leh, March thlaahte pawh ling an awm ṭhin thu Vanglaini a hrilh a, kumin bikah erawh chuan ling tlai deuh, May thla kái an awm nual thu sawiin, "March thla leh May thlaa lin chu a inthlau lutuk," a ti a, May thlaa linte a ṭhat loh zawk thu a sawi. Phulpuiah hian chhungkua hmun thuma ṭhena hmun hnih velin fu huan an nei a ni.
Fu chíng uar khaw dang, Lungleng pa pakhat chuan Vanglaini zawhna chhangin, an khuaah March leh April thlaah fu an lin ṭhin thu a sawi a; Khawlailung nu pakhat pawhin, April thlaah an ling ber a, March thlaa ling pawh an awm fo thu sawiin, "Ṭo haw khalh ngei kan tum ṭhin," a ti.
Thorang MNF thuchhuak
Hetih lai hian, MNF, Thorang Block-I chuan May 30, 2022 khan press release siamin, fu chî chu a dawngtute'n an paih lo nia tarlangin, "An thenna leh an singsakna hnawk an paih mai niin fu chi dawngtute hian an sawi," an ti a; thu dik tâwk lo thehdarh a nia sawiin, mak an tih thu an tarlang.
Thorang Block- I MNF chuan, "Fu chi hi a phurhna leh lâk khawmna a hlat tham mai bakah, tun ruahsurah a phurtute'n harsatna an tawh nasat
avangin a hmélhmang mawi lo deuh a awm laiin, a tam zawk erawh chìn tlâk a ni a, a chawrna tur a mit pawh a tlangpuiin a ṭha thawkhat," tiin an tarlang a ni.