Aizawla wine mante MLP Act-in a khap leh man theih vek a ni - END

Excise & Narcotics Department (END) chuan nimin khan thu­chhuah siamin, May 27, 2022-a Aizawl khawpui lûn laia wine mante chu Mizorama zu khuahkhirhna dan hman mek, The Mizoram Liquor (Prohibition) Act, 2019-in a khap leh man theih vek a nih thu an tarlang.

END thuchhuah chuan, "27th May, 2022 khan Aizawl khawpui hmun lûn laia dawr ṭhenkhatah ualau takin zu leh a kaihhnawih zuar an awm tih report dawn a nih anga hmalaknaah heng zu leh a kaihhnawihte hi an man," tiin, an mante hming leh man zat a tarlang a; chu'ngte chu - Korean siam Soju (360 ml) ûm 171, beer (500 ml) can 91, Royal Stag whisky (750 ml) ûm 13 leh Magic Moment vodka (750 ml) ûm 10 a ni.

END chuan, "Millennium Centre (MC) chhunga dawr ṭhenkhat aṭangin hengte hi man a ni bawk," tiin, MC chhunga man list an tarlang bawk a; chu'ng zingah chuan zu (rum, whisky, vodka, etc.) a tel lo.

MC chhunga an man an tarlante chu - Korean siam Soju (360 ml) ûm 32, beer (500 ml) can 15, Champwine (750 ml) ûm 2,726, Champwine (375 ml) ûm 3,675 leh Dark Wine (375 ml) ûm 16 a ni.

MC chhunga dawr aṭang vekin Fanai Wine (750 ml) ûm 294, B.CH. Grape Wine (750 ml) ûm 226 apple wine (tagged apple juice) litre 660 leh grape wine litre 32 man a ni bawk a; hengte hi khawi lam aṭanga chhuak nge hriat a nih loh thu END thuchhuah chuan a tarlang.

END chuan, a chunga tarlante chu The Mizoram Liquor (Prohibition) Act 2019-in a khap vek leh man theih vek a nih thu tarlangin, "The Mizoram Liquor (Prohibition) Act, 2019-in a sawi angin, 'Thil tuirîl reng reng, alcohol telna chu zu a ni (….includes any liquid containing or consisting of alcohol) [ref. Sec 2(r) of MLP Act, 2019] a tih angin, zu kawl, neih, siam, zawrh, hralh, in, etc. hi khap a ni a, hetiang laka inthiarfihlîm ṭheuh turin mipui ngen an ni," an ti.