Aizawlah Iconic Week hman a ni

India independence kum 75-na lawmna, Azadi Ka Amrit Mahotsav pualin India rama khawpui 75-ah Iconic Week hman a ni a, Aizawlah pawh nimin khan Chanmari YMA Hall-ah hman niin, Lok Sabha MP C Lalrosanga'n a hmanpui. Iconic Week hi bank kaihhnawih bik a ni.

Iconic Week hawnna inkhawm hi Lead Bank convener David N Lhouvum-in a kaihruai a; lead district manager PC Lallawmkimi'n sorkar laipui scheme chi hrang hrang, loan chi lâk theihte leh social security scheme-te a sawifiah.

C Lalrosanga chuan, bank hotute chu Mizoramah branch tam zawk hawn belh turin a chah a; sorkar laipuiin mipui tana scheme a siamte chu loan hmanga a hlawhtlinna awm thei turin mipuite dilna hnâwl mai mai lo tura bank-te a chah rualin, sorkarin mipui hamṭhatna atana social security scheme a duante chawi lâr tur leh hmang ṭangkai turin mipui a chah a ni.

Sorkar laipui ruahman lâwk angin, chawhma dar 10:30-ah sorkar hmalakna video thlirho a ni a, prime minister Narendra Modi-a’n pawisa thîr (coin) thar - Re 1, Rs 5, Rs 10 leh Rs 20-te a tlangzarh a, mahnia loan dil theihna Jan Samarth Portal a tlangzarh bawk.