KHAWTHLIR

Thisen pe
YMA, Seling Branch chuan nimin khan an YMA Hall-ah thisen pek an huaihawt a, Civil Hospital, Aizawl tan thisen unit 82 an pe a, petute mipa 68 leh hmeichhia 14 an ni.

Farmers Haat
Sangau Farmers Haat sak thar chu nimin khan bialtu MLA H Biakzaua'n a hawng. Farmers Haat hi Sangau-II Vengthar bazarah sak niin, Sangaua VC-te'n material work an thawh khawm Rs 10,00,000 hmanga sak a ni.

Kawng laih khuar phalna pe dawn lo
PWD, Aizawl Road North leh South division-te chuan hriattirna tichhuakin, fûr ruahtui a tlak tawh avangin road cutting permit June 16, 2022 aṭangin pek chhuah a nih tawh dawn loh thu an tarlang. Hmanhmawh thlak bika phalna mamawhte chu June 15, 2022 hmaa kawng tan (laih khuar) hman a nih theih nan dilna thehlut turin an hriattir a ni.

Vawk lak luh khap
Serchhip additional district magistrate Lalmuansanga Ralte chuan nimin khan Serchhip district-ah hmun dang aṭanga vawk lak luh khap a nih thu a puang. Serchhip district-a khuate pawh vawk inlak pawlh loh tur leh vawk suat duhte tan AH&Vety department-ah dilna thehluh tur a nih thu a tarlang bawk.

Heroin man
Excise & Narcotics department chuan June 5, Pathianni zan dar 9:40 khan Champhai Zote leh Bulfek (Myanmar) inkar kawnga Tlangcheng khuaah heroin gram 306 (hawng 25) an man a, a neitua puh Robert Thangsumlanga (29) s/o Simon Thangdoliana, Champhai Bethel Veng nia inchhál an man bawk.

Rs 72,640 hmu
Aizawl Zoological Park (Sahuan) chuan May 2022 chhung khan Sahuan tlawhtute aṭangin Rs 72,640 an hmu. Fûr a nih tawh avang leh sikul luh ṭan a nih tawh avangin Sahuan tlawhtu an tlahniam hret tih Sahuan enkawltute chuan an tarlang.

HIV/AIDS sawiho
Lawngtlai District AIDS Prevention and Control Committee (DAPCC) chu an chair man Amol Srivastava, bawrhsap hoin nimin khan an ṭhukhawm. April 2021 - March 2022 chhungin Lawngtlai district-ah general client 2,175 endik aṭangin HIV vei mi 58 leh nu nau pâi 1,535 endik aṭangin mi
pakua, an vaiin mi 67 hmuh chhuah a nih thu tarlan a ni.

COTPA sawiho
Lawngtlai District Task Force on Implementation of COTPA chu an chairman Amol Srivastava, DC kaihhruaiin nimin khan Cigarettes and Other Tobacco Products Act (COTPA), 2003 kenkawh dan tur sawiho a ni. April 2016 - May 2022 chhungin COTPA hnuaiah ṭum 385 endik a ni a, dan bawhchhia mi 579 man niin, pawisa chawi tling khawm Rs 35,170 a nih thu an tarlang.

Ward Committee thu
Aizawl Municipal Corporation (AMC) WardXIV Ward Committee chu nimin khan bialtu councillor Ramthanzauva hoin Khatla Local Council House-ah an ṭhukhawm a; property tax return sum hman dan tur leh pawimawh dangte an rél a ni.