Mi taimate hlawhtlinna ramah Mizoram siam kan tum - Lalsawta

Mizoram Pradesh Congress Committee (MPCC) president Lalsawta chuan, thawhrimna hmanga dinchhuah an tum dawn tih sawiin, "Mi taimate hlawhtlinna ramah Mizoram hi siam kan tum," a ti.

Highway Tourist Lodge, Thingdawla nimina lawm luhna inkhawmah thu sawiin Lalsawta chuan, "Party dang presidentte angin kawng hahdam leh nawmsakna ringawt ka tiam ve thei lo che u. Beidawng tawhte tan thawhrimna ka tiam che u a, thawhrimna hmanga dinchhuah kan tum dawn. Kan ramah rethei tam tak an awm a, kut hnathawktute leh ṭhalai beidawng tam tak an awm a, Congress sorkar hun an nghakhlel em em a ni," a ti a; Mizoram chu ram ṭha a nih theih nan theihtawp chhuaha thawhpuiah a sáwm.

MPCC President chuan, Pathianin ram leh mipui ṭha a pe tih sawiin, "Congress party chuan ram leh mipui kan hmang ṭangkai dawn, kan tan thil harsa a awm lo," a ti a; "Pathian zara Congress party-in sorkarna kan chang a nih chuan anmahni zâwn ṭheuha kan puihna tur ṭang puihna kan siam dawn. Mi taimate hlawhtlinna ramah Mizoram hi siam kan tum a, kan ṭan rual chuan kan hlawhtling ngei dawn a ni," a ti bawk.

MPCC general secretary H Rohluna pawhin thu sawiin, "MNF party-te'n sorkarna an chan hmasak laia eirûkna a nasat ang bawkin tun sorkarah pawh eirukna a nasa em em a, hlâwkna an têl dawn a nih phawt chuan khaw eng an zah lo a, a hotupa berin pawisak a neih miau loh avangin a naute ho pawh an duh duhin an che ta mai a ni," a ti a; Congress sorkar laiin NEDP hnuaiah New Market sakna tur cheng nuai 3,641 an dah tawh chungin MNF sorkarin tun thlengin a la sa pui tling thei lo a, bazara ṭhute mangang takin an awm mek tih a sawi.

MPCC thuchhuah chuan, lawm luhna inkhawmah hian chhungkaw 20 aṭangin mi 59 Congress party-ah lawm luh an nih thu a tarlang.