Kan CM-in vision neiin hna a thawk - K Lalrinliana

MNF adviser K Lalrinliana, minister of state chuan nimin khan Mizo Hnam Runa inkhawmah thusawiin, chief minister Zoramthanga'n vision (hmathlir) a nei a, a vision angin hna a thawk niin a sawi.

K Lalrinliana chuan, an hotupa ber chu party dangte'n tihchhiat an tum ber a nih thu sawiin, "Kan CM hian vision a nei. Vision nei lo chu politician ni tlakah ka ngai lo. Kan CM hian vision neiin hna a thawk a, chawpchilha tihhlawhtlin theih lohte a nih avangin eptute hian remchangah lain kan pu beih nan an hmang a ni," a ti.

Mizoram chu India rama tuialhthei dah khawlna (oil depot) nei lo awm chhun state a nih thu sawiin Lalrinliana chuan, "Oil dah khawmna kan neih chhun chu petrol pump a ni mai a, ti khat vek pawh ni ila, ni nga bak a daih lo. Kan sorkar tirh khan oil dah khawlna neih tumin hma kan la a, central kan dawr tawh. A hmun tur kan inbiak fel hnuah company lamin duh dan dang an rawn nei leh," a ti a, tun aṭanga thla thumah hna ṭan theih an beisei thu a sawi.

K Lalrinliana chuan, Mizorama kudam hrang hrangah thla 4-7 daih tur buhfai chhêk khawl a nih thu sawiin, "Fûrpui leh kawng chhiain harsatna a thlen a, kawngpui ṭha zawk sial tura hmalak a ni. Kudam kan nei chhe hle a, kan sorkar tirh khan sak ngei ngei ngai 65 kan nei a, kan sak tawh chinah mite'n ṭha min tihpui viau," a ti.

FCSCA Minister sawi danin, MNF an sorkar hmain ni tin gas trip 15 Mizoramin a dawng a, an sorkar tirhah ni tin trip 20 turin an dil a, ni tin trip 23 pek an ni ta zawk a ni.

K Lalrinliana chuan, Congress party hun a tàwp tawh a, kil tin aṭangin tih ngaihna a awm tawh lo niin a sawi a; ZPM chu lian anga an lan chhan chu Congress mipui inphatsan vang niin a sawi bawk.