Champhai-Zokhawthar kawng endik

Nimin khan Champhai Zotlang YMA Hall-ah Champhai-Zokhawthar kawng, National Highway no. 6-a lirthei leh mipui himna tur chungchangah inràwnkhawmna neih a ni a, kawngpui endik nghal a ni. He hun hi Champhai district bawrhsap James Lalrinchhana'n a kaihruai.

James Lalrinchhana chuan, lirthei tlân chak lutuk tur venna atana siam ṭhin speed breaker dahte chu mipui him tura duan ni mah se, a nihna ang tur ni loa siam a nih chuan lirthei khalhtute harsatna thlentu a ni thei tih a sawi a, "Mipui himna dah pawimawh hmasa ber chungin khawtual mite nen ngaihtuaha siamrem dan dap a ṭul.

Indian Road Congress inkaihhruaina zûlzuiin kawnga lirthei tlânte tana him tur ngaihtuah tel a ṭul a ni," a ti.

Champhai SP Lalrinpuia Varte pawhin thu sawiin, mipui chênna hmun paltlang NH kawngpuiah mipui himna tur thilah inngaihhnathiamna a awm thu te, speed breaker mumal lo taka siam a nih chuan chetsualna thlentu a nih theih thu te, inkaihhruaina zâwm chungin speed breaker siam a ṭul thu leh, langsar taka hmuh mai theiha siam a ngaih thute a sawi bawk.

Inràwnkhawmnaah hian Champhai additional DC Henry C Lalrawnkima, additional SP C Lalengliana, SDO (Sadar) Lalnunfela Chawngthu, PWD, General Reserve Engineer Force, Traffi c hotute leh khawtlang hruaitute an tel a ni.