Aikal lâk thin tihtawp hi Thil khirh tak a ni - CM

March 14 aṭanga neih ṭan Mizoram Assembly budget session chu chhunzawm zel a ni a, nimin session-ah Department of Personal & Administrative Reforms (DPAR) changtu, chief minister Lal Thanhawla chuan, sorkar hnathawkte'n aikal an lak ṭhin tihtawp chu thil khirh tak a nih thu a sawi.

MNF member Lalruatkima zawhna kal zelah Chief Minister chuan, aikal lak chungchang zawhna a lut chu lawmawm a tih thu a sawi a, "Aikal lak tihtawp hi a khirh khawp mai a, kal zel dan tur pawh ngaihtuah a ṭul. Engtin nge kan kal zel ang tih inràwntlanna tur chi a ni," a ti.

Chief Minister sawi danin, tun dinhmunah sorkar hnathawk nghet aikal la mi 28 leh muster roll aikal la mi pali, an vaiin 34 an awm. Aikal late hi department hrang pali - School Education, Home, Finance leh Lan Revenue & Settlement-a mite an ni a, a tam ber LRS department-ah aikal la mi 22 an awm.

Aikal lak hi sorkar phal loh a ni a, titawp turin office memorandum leh letter vawi kua chhuah a ni tawh. Aikal an lak hun hi hriat a ni lo a, aikal an lak chhante chu thuneitute an hriattir hlawm a ni.

Aikal an lak chhan hrang hrangte chu - dam lohna vang te, an post-a in luah tur hmuh loh vang te, chhungkaw thil vang leh chhan hriat loh (chhungkua harsatna eng emaw thleng sawi chhuah chi si loh) vangte a ni.

Chief Minister chuan, aikal lak khapna order chhuah ṭhin ni mah se, tihtawp a hautak tih sawiin, "Humanitarian point of view leh compassionate ground-a hriatthiam loh theih lohte an awm a ni," a ti.

Aikal lak chu employment generate-na kawng khat a nih ve thu sawiin CM Hawla chuan, "Aikal atana an lakte hi a thawktu pangngai aia an office-in an lo duh zawkte pawh an awm ve," a ti a; post tihruah tawp aiah inhriatthiamna aikal lak phalsakte an awm thu a sawi.

Nimin session-ah hian Planning minister Lalsawta'n Economic Survey, 2016-2017 a pharh a; Estimate Committee chairman PC Zoram Sangliana leh Public Account Committee chairman Lalruatkima leh, Committee on Government Assurances chairman R Vanlalvena ten an Committee ṭheuh report an pharh bawk.

Finance Minister-in sorkar kum kal meka sum indaih lohna phuhrûkna tur, Supplementary Demand for Grants a pharh a, sawiho loin,lungrual taka pass a ni.