Mathematics Summer Camp buatsaih ṭan

Mizoram Science, Technology & Innovation Council (MISTIC) leh Mizoram Mathematics Society (MMS) chuan nimin khan Pachhunga University College-ah chawlhkar khat awh tur Mathematics Summer Camp an buatsaih a, Mizoram sorkara chief scientific officer Dr RK Lallianthanga'n a hawng.

Dr RK Lallianthanga chuan, hna laknaa exam chi hrang hrang atan mathematics a pawimawh tih sawiin, "Hna zawnna mai bakah, eng hna pawh thawkin, eng pawh ti ila, mathematics thiam hi a pawimawh. Tunlaiah chuan thil chîk peih a ngai em em a, uluk taka ngaihtuahna séng thiam turin mathematics zir hian nasa takin a pui thei a ni," a ti.

Chief Scientific Officer chuan, zirlai tan mathematics thiam turin ngaihtuahna sên peih, chawh tam leh thiam loh zirtirtute zawh peih a pawimawh tih a sawi a; Mathematics Summer Camp chu hmang ṭangkai ngei turin zirlaite a chah.

MMS secretary Dr LP Lalduhawma chuan, tun ṭum hi Mathematics Summer Camp an buatsaih vawi hnihna a nih thu leh Camp chu zirlaite'n sikul chawlh an hman ṭangkaina tura duan a nih thu a sawi a, "Class X-ah mi 53 leh Class XII-ah mi 14 admit an ni a, Camp chhung hian mathematics topic hrang hrangah Mizorama mathematics zirtirtu thiam tak takte'n zing dar 10 aṭanga tlai dar 3 thleng an zirtir ṭhin dawn a ni," a ti.

Mathematics Summer Camp hi March 24 thleng neih a ni ang.