Vote zawnna budget a ni - Duhoma

ZNP president Lal­duhoma chuan nimin khan Aizawl Press Club-ah thuthar thehdarhtute a kâwm a; Finance Minister-in kum 2017-18 atana Mizoram budget tur a pharh tâk chu vote zawnna budget a nih thu a sawi.

Lalduhoma chuan, NLUP thlakna tur NEDP atan cheng vbc. 750 budget-ah dah a nih thu sawiin, "Development dangin nasa zawkin a tuar leh dawn. Ṭhalaite'n bul an ṭanna tur leh thlai thar leina turte an la dah chuang lo. NLUP ang thoa party-a member lak luhna leh retheite zalenna chhuhsakna hmanrua tur a ni. He budget hi deve­lopment a tinzawn lo a, vote zawnna, 'Election oriented budget' a ni," a ti.

Kawngpui thawm ṭhat­na atan budget-ah nikum aia 259%-a tam leh kawng siam mek leh a thar siamna atan nikum aia 70%-a tam dah a nih thu sawiin ZNP President chuan, "Mipuiin kawngpuite danga kan nawr hma chuan an ngaihsak ngai lo kha a ni ṭhin," a ti a; inthlan dawna siam theih a nih chuan kum dangah pawh siam theih awm tak a nih thu a sawi.

Lalduhoma chuan, budget-ah inrenchemna lam hmuh tur a vàn thu sawiin, "Meeting neih níkhuaa tui ûm lian, a têa thlak tih vel mai mai hi sawi fo tawh lo se a ṭha ang. Bangla chei vak vak te, zinnaa inzui duah duah te, helicopter-a zin fo te, sikul naupang inhmuah tirte leh milian ho nawmchennate hi tihtawp ngai zawk chu a ni," a ti.

Sum enkawl lamah Cong­ress sorkar fakin Duh­oma chuan, "Kum 2008 kum tàwp lam aṭanga Congress an rawn sorkar khan kum khat chhungin leiba 103% aṭangin 90%-ah an tihniam thei. Kumina kan leibat tur chu GSDP aṭanga chhûtin 40.87% a ni a, MNF khan leiba GSDP aṭanga chhûta 103% a hnuchhiah a ni," a ti a; leibat zat chu GSDP aṭanga a percentage-a chhût tur a nih thu a sawi.

ZNP President chuan, fiscal deficit nei lo turin state tinte nawr reng an ni tih sawiin, "Sum hnár nei lo keini state angte erawh hi chu special category-ah min dah a, sum indaih lohna min tumsak ṭhin. Kum 2020 thlenga fiscal deficit neih min phalsak zat chu GSDP aṭanga 3% thleng a ni a, Congress hian kum 8 ro an rel chhungin 0.79%-ah an ti thla thei a, a lawmawm hle," a ti.

Lalduhoma sawi danin, Congress leh MNF policy-te chu 'Sem Policy' a ni a, MIP leh NLUP hnuaiah cheng vaibelchhe sang tam tak sem ral ni tawh mah se, Mizoramah hmasawnna an thlen chuang lo.

India Today-in state hrang hrangte dinhmun a tarlan ṭhinah, state tênau thlan chhuah sawm zingah Mizoram chu a záwnin a hniam berah a awm ṭhin. Sum tam tak sên a nih tawh hnuah pawh GSDP hniam ber a ni reng tho. Tuna Mizoram GSDP chu vbc. 17561.60 a ni a, a tam ber chu sorkar hnathawk leh contractor-te thawh a ni.

Lalduhoma chuan sorkar kalphung thar a awm a ngai tih sawiin, "America ramah chuan term hnih, kum 8 bak president nih an duh lo. Danin a khap lo a, kalphung angah an nei mai zawk a ni. Term hnih chhung ram an hruai tawh chuan an tih tur ti zo tawhah inngaiin mi dang an kian ṭhin. Kan ramah vawi nga CM ni tawh te, vawi hnih ni tawhte pawhin chawlh zai an rel thei lo," a ti.

Mizoram mipuiin MNF leh Congress damdawi hlir an lei a, an ngeih lo nia a hriat thu sawiin ZNP President, "Tumah interek hrang loin, mipui, mithiam rual leh ṭhalai rualte hi collective leadership hnuaiah 'Mipui sorkar' siam turin intelkhawm ang u," a ti a; sorkarnaa tel hrim hrim aiin an party chuan MNF leh Congress tel lo sorkar siam an ngaih pawimawh hmasak thu a sawi.