SRS ruihhlo man Rs. 57,77,500 hû hâl ral

Central YMA hnuaia Supply Reduction Service (SRS)-te'n ruihhlo chi hrang hrang an man Rs. 57,77,500 hu chu nimin zing khan CYMA Hall kawtah Mizoram Kohhran Hruaitute Committee (MKHC) chairman Rev. Lalzuithanga'n a hâl ral.

Ruihhlo hâl hmain CYMA pisa conference hall-ah inkhawm tâwi buatsaih a ni a; Rev. Lal­zuithanga chuan, "Zu leh ruihhlo hi kan ram hian a mamawh lo a, kan hnam ralna tur a ni. Kum 20/30 a ral meuh chuan ṭhalai fa hring tur kan nei lo mai ang tih a hlauhawm hle a ni," a ti.

MKHC Chairman chuan, ram chu eng ang pawhin hmasawnin changkang mah se, a chhunga mite rilru a ṭawih chuan ramin a chhiat phah tho dawn tih sawiin, "Ruihhlo zuar leh ti ṭhinte hi Chanchinṭha nena kan enkawl loh chuan talhfiak ringawt chuan awmzia a awm meuh lo," a ti a; kohhrante pawhin a theih ang anga hma an lak a ngaih thu a sawi. Ruihhlo zuartute chu an tu leh fate ralna tur thil an ti a ni tih hre turin a chah.

CYMA president Lalbiakzuala pawhin thu sawiin, ruihhlo donaah mutthlu thei an ni lo tih a sawi a, "Ruihhloin khawtlang a tibuai a, a siruk laa kan do a ngai tak meuh tawh. Ruihhlo vanga OD a tlahniam tawh emaw kan tih laiin, tun thla thum chhung hian mi 20 chuang ruihhlo vangin an OD tawh a ni. Ruihhlo donaa hma kan laknaah hian hmangaihna leh khawngaihna nena hma kan lak a pawimawh," a ti.

Inkhawmah hian SRS batch 5-na atana convener tur J Lalsailova, CYMA treasurer-in barṭtch 4-na convener R Lalngheta hnen aṭangin SRS kaihhruainaa mawhphurhna a la nghal a ni.

Ruihhlo hâl ral tâkte hi SRS-in an man khawm sa ruihhlo chi hrang hrang a ni a, Rs. 57,77,500 hû a ni. SRS hian April 11, 2015-a bul an ṭan thar leh aṭanga March 19, 2017 thleng khan ruihhlo chi hrang hrang Rs. 12,38,01,185 hu an man tawh.

Report an pek danin, Mizorama heroin lut zawng zawng zinga 99.9% chu Myanmar aṭanga lo lut a ni a, heroin-a sumdawngte zingah mipa aiin hneichhia a letin an tam zawk. Heroin ti ṭhin tam zawk chu chhungkaw khawsak harsa tak taka mi an ni a; SRS-in heroin vanga mi an man tawh zinga naupang ber chu kum 11 mi a ni a, a upa ber kum 60 chuang a ni.

SRS batch 4-na hian Metham­phitamine (Meth) mûm 31,800 an man a, Opium kg. 15.5 an man. Licence neia damdawi zuar zingah dan loa khuh damdawi leh mutna lam damdawi hralh ṭhin damdawi dawr pali an man a, dawr pahnih chu sorkarin an drug licence a tihtawpsak a ni.